Ky qytet u shpall më i qeti në Evropë për vitin 2026, dy qytete zvicerane në top 10

Ky qytet është shpallur më i qetë në Evropë për vitin 2026

Talini është shpallur qyteti më i qetë në Evropë për udhëtarët në vitin 2026, sipas një renditjeje që ka analizuar 66 qytete evropiane në bazë të disa faktorëve që lidhen me qetësinë, sigurinë dhe cilësinë e mjedisit, transmeton albinfo.ch.

Renditja, e publikuar nga kompania Vape & Go, ka marrë në konsideratë faktorë si niveli i zhurmës gjatë ditës dhe natës, hapësirat e gjelbra, cilësia e ajrit, mundësia për të lëvizur në këmbë dhe siguria.

Kryeqyteti i Estonisë ka grumbulluar 92.8 pikë nga 100, duke u renditur në krye të listës.

Një nga faktorët që ka ndikuar në rezultatin e lartë të Talinit është niveli i ulët i ekspozimit ndaj zhurmës gjatë natës. Sipas të dhënave të përdorura në studim, vetëm 0.84 për qind e banorëve janë të ekspozuar ndaj zhurmës së trafikut rrugor dhe hekurudhor gjatë natës.

Talini vlerësohet gjithashtu për kombinimin e hapësirave të gjelbra, bregdetit dhe qendrës historike. Qyteti i Vjetër mesjetar është pjesë e Trashëgimisë Botërore të UNESCO-s, ndërsa rrugicat me kalldrëm, kullat historike dhe parqet e bëjnë qytetin një destinacion të përshtatshëm për shëtitje dhe pushim.

Cyrihu në vendin e dytë

Në vendin e dytë u rendit Cyrihu, me 88.1 pikë, duke u pozicionuar menjëherë pas Talinit.

Qyteti më i madh i Zvicrës është vlerësuar në disa prej kategorive të analizuara nga studimi, duke u renditur para Tartut të Estonisë.

Në vendin e tretë u rendit Tartu, me 86.6 pikë.

Në dhjetëshen e parë janë përfshirë edhe Trondheim, Vilnius, Haga, Rijeka, Gjeneva, Tampere dhe Lubjana.

Dy qytete zvicerane në dhjetëshen e parë

Përveç Cyrihut, në listë është përfshirë edhe Gjeneva, e cila u rendit në vendin e tetë.

Kështu, Zvicra është një nga dy shtetet që kanë nga dy qytete në dhjetëshen e parë të renditjes, së bashku me Estoninë.

Studimi ka veçuar edhe qytete për rezultate specifike në kategori të caktuara. Lubjana është vlerësuar për përqindjen e lartë të hapësirave të gjelbra, Tampere për cilësinë e ajrit, ndërsa Haga për rezultatin në kategorinë e sigurisë.

10 qytetet më të qeta në Evropë për vitin 2026

1. Talini, Estoni – 92.8 pikë
2. Cyrih, Zvicër – 88.1 pikë
3. Tartu, Estoni – 86.6 pikë
4. Trondheim, Norvegji
5. Vilnius, Lituani
6. Hagë, Holandë
7. Rijeka, Kroaci
8. Gjenevë, Zvicër
9. Tampere, Finlandë
10. Lubjanë, Slloveni

Në dhjetëshen e parë dominojnë qytetet e Evropës Veriore dhe Qendrore, të cilat dallohen për kombinimin e niveleve të ulëta të zhurmës, hapësirave të gjelbra, cilësisë së ajrit dhe sigurisë./Albinfo.ch

---