“Shame and Money” i Visar Morinës shfaqet premierë në Berlin

Filmi i regjisorit kosovar Visar Morina u prezantua para një salle të mbushur në kryeqytetin gjerman, me pjesëmarrjen e përfaqësuesve të institucioneve gjermane, diplomatëve, gazetarëve, artdashësve dhe pjesëtarëve të diasporës shqiptare

Filmi “Shame and Money” (“Von Scham und Geld”), me regji të regjisorit kosovar Visar Morina, ka pasur premierën në Berlin, duke sjellë kinematografinë kosovare para publikut gjerman.

Sipas diplomatit të Kosovës në Gjermani, Faruk Ajeti, premiera u zhvillua në një sallë të mbushur, në praninë e përfaqësuesve të institucioneve gjermane, deputetëve, ambasadorëve, anëtarëve të trupit diplomatik, gazetarëve, artdashësve dhe bashkatdhetarëve që jetojnë në Gjermani.

Në premierë ishte i pranishëm edhe regjisori Visar Morina, së bashku me aktorët Astrit Kabashi, Flonja Kodheli dhe Fiona Gllavica, transmeton albinfo.ch.

Pas shfaqjes së filmit, Morina dhe aktorët bashkëbiseduan me publikun, duke ndarë përvojat e tyre nga realizimi i filmit dhe rrugëtimi i tij ndërkombëtar.

Ajeti e cilësoi ngjarjen si një mundësi të veçantë për promovimin e kinemasë kosovare dhe prezantimin para publikut gjerman të një vepre që po ndërton rrugëtimin e saj në skenën ndërkombëtare të filmit.

“Shame and Money” është përzgjedhur si kandidati i Kosovës për kategorinë International Feature Film në edicionin e 99-të të Academy Awards, që do të mbahet në vitin 2027.

Përzgjedhja si kandidaturë kombëtare është hapi i parë në procesin e Academy Awards; lista e ngushtë dhe nominimet zyrtare përcaktohen më pas nga Academy of Motion Picture Arts and Sciences.

Premiera në Berlin i shtohet prezantimeve ndërkombëtare të filmit dhe synimit për ta sjellë kinematografinë kosovare para një audience më të gjerë evropiane dhe ndërkombëtare.

---