Zilet lejohen për lopët, por jo për gomarët në Cyrih

Gomari në një fermë në Cyrih nuk lejohet më të mbajë zile

Gjykata Administrative e Cyrihut ka shqyrtuar ankesën e një banori lidhur me zhurmën e shkaktuar nga zilet e lopëve dhe gomarëve në një fermë në komunën e Hinwilit, transmeton albinfo.ch.

Sipas vendimit, lopët mund të vazhdojnë të mbajnë zile të vogla, pasi ato konsiderohen si një masë për të parandaluar largimin e tyre nga ferma.

Ndërsa për gomarët, gjykata ka vendosur ndryshe. Ata nuk do të lejohen më të mbajnë zile, pasi gjykata ka vlerësuar se rreziku që gomarët të largohen nga ferma është më i ulët.

Një tjetër argument lidhet me traditën. Gjykata thekson se përdorimi i zileve është një element i rëndësishëm i traditës dhe kulturës së blegtorisë zvicerane, veçanërisht në rastin e lopëve. Megjithatë, sipas saj, ky argument nuk mund të zbatohet në të njëjtën mënyrë edhe për gomarët.

Kështu, ankesa për zhurmën është pranuar pjesërisht: lopët do të vazhdojnë të mbajnë zile, ndërsa gomarët duhet të qëndrojnë pa to. /Albinfo.ch

---