Polonia i kërkon BE-së të gjobisë Metan me 250 milionë euro për reklamat mashtruese

Polonia i ka kërkuar Komisionit Evropian t’i vendosë kompanisë Meta një gjobë prej 250 milionë eurosh për reklamat mashtruese dhe përmbajtjet e dëmshme që synojnë përdoruesit polakë.

Ministri polak i Çështjeve Digjitale, Krzysztof Gawkowski, e bëri thirrjen përmes një postimi në rrjetin social amerikan X.

“Ky Perëndim i Egër në platformë duhet të marrë fund”, deklaroi Gawkowski, duke i kërkuar gjithashtu Metas të prezantojë menjëherë mjete efektive për eliminimin e mashtrimeve, reklamave të rreme dhe promovimit të aplikacioneve të paligjshme.

“Mosveprimi dhe dështimi për të luftuar në mënyrë efektive reklamat e dëmshme dhe përmbajtjet mashtruese që synojnë përdoruesit polakë nuk do të tolerohen”, shtoi ai.

Gawkowski publikoi edhe një pjesë të një letre drejtuar Henna Virkkunen, zëvendëspresidentes ekzekutive të Komisionit Evropian për sovranitetin teknologjik, sigurinë dhe demokracinë.

“Shkalla e këtij fenomeni tregon një problem të rëndësishëm me mënyrën se si funksionon reklamimi në një nga platformat më të mëdha online në tregun e vetëm evropian”, thuhet në letër.

Në dokument theksohet gjithashtu se Meta ka dështuar të ndërmarrë masa efektive, pavarësisht raportimeve të përsëritura nga autoritetet polake dhe ekipet e sigurisë kibernetike.

Thirrja e qeverisë polake vjen pas shqetësimeve të reja lidhur me përmbajtjet e krijuara me teknologjinë deepfake. Sipas raportimeve, një video e gjeneruar me inteligjencë artificiale, në të cilën imitohej presidenti polak Karol Nawrocki dhe promovohej një skemë mashtruese investimi, kishte qarkulluar në Facebook.

Edhe miliarderi polak Rafal Brzoska, themelues i kompanisë së dërgesave të pakove InPost, ka kritikuar së fundmi përdorimin e paautorizuar të imazhit të tij në reklama mashtruese në platformat e Metas.

Meta deklaroi se lufta kundër reklamave mashtruese është “një nga sfidat më komplekse me të cilat përballen aktualisht ekosistemet digjitale” dhe se ajo kërkon bashkëpunim ndërmjet platformave, qeverive dhe agjencive ligjzbatuese.

Kompania bëri të ditur se ka hequr rreth 137 mijë reklama me origjinë nga Polonia, gjatë periudhës korrik 2025 – qershor 2026, për shkelje të politikave të saj kundër mashtrimit. Sipas Metas, më shumë se 88 për qind e këtyre reklamave janë hequr përpara se të raportoheshin nga përdoruesit.

Megjithatë, Gawkowski tha se Meta nuk ka paraqitur masa bindëse dhe efektive për mbrojtjen e përdoruesve polakë.