Vdes Ratko Mlladiq, ish-komandanti serb i Bosnjës i dënuar për gjenocid

Ratko Mlladiq, ish-komandanti i Ushtrisë së Republikës Srpska dhe një prej figurave kryesore ushtarake të luftës në Bosnje dhe Hercegovinë, ka vdekur në moshën 84-vjeçare, njoftoi televizioni shtetëror serb RTS.

Mlladiqi, i cili vuante dënimin në një njësi të Kombeve të Bashkuara në Hagë, ishte dënuar me burgim të përjetshëm për gjenocid, krime lufte dhe krime kundër njerëzimit. Vendimi i Gjykatës Penale Ndërkombëtare për ish-Jugosllavinë, i dhënë në vitin 2017, u konfirmua në apel në vitin 2021.

Ai u shpall përgjegjës, ndër të tjera, për rolin e tij në masakrën e Srebrenicës në korrik 1995, ku u vranë rreth 8 mijë burra dhe djem boshnjakë. Mlladiqi u arrestua në Serbi në vitin 2011, pas 16 vitesh në arrati.

Ish-gjenerali serb i Bosnjës kishte pasur probleme të rënda shëndetësore gjatë muajve të fundit. Vetëm pak ditë para vdekjes së tij, autoritetet gjyqësore ndërkombëtare në Hagë kishin refuzuar kërkesën e familjes dhe të qeverisë serbe për transferimin e tij në një spital ushtarak në Beograd për trajtim.

Ratko Mlladiqi mbetet një figurë thellësisht kontroverse në rajon. Ndërsa drejtësia ndërkombëtare e ka cilësuar përgjegjës për disa prej krimeve më të rënda të kryera gjatë luftës në Bosnje, ai vazhdon të glorifikohet nga një pjesë e komunitetit serb në Serbi dhe Bosnje e Hercegovinë.

Lufta në Bosnje dhe Hercegovinë, e zhvilluar nga viti 1992 deri në vitin 1995, shkaktoi rreth 100 mijë viktima dhe zhvendosi miliona njerëz/albinfo.ch/