SHBA pezullon përkohësisht intervistat për vizat e emigracionit

Administrata amerikane ka vendosur të pezullojë përkohësisht intervistat për vizat e emigracionit në ambasadat dhe konsullatat e Shteteve të Bashkuara në vende të ndryshme të botës.

Sipas Departamentit Amerikan të Shtetit, pezullimi lidhet me një trajnim të ri që po zhvillohet për zyrtarët përgjegjës për shqyrtimin e aplikimeve për viza. Për këtë arsye, intervistat e planifikuara do të shtyhen dhe aplikantët do të informohen për datat e reja.

Trajnimi synon të rrisë nivelin e kontrollit ndaj aplikantëve, veçanërisht sa i përket mundësisë që ata të varen nga ndihmat financiare apo shërbimet sociale të ofruara nga shteti amerikan.

Vendimi vjen në kuadër të politikave më të rrepta të administratës së presidentit Donald Trump ndaj emigracionit. Gjatë kësaj periudhe janë ndërmarrë masa që kanë përfshirë dëbime, anulime vizash dhe kufizime të tjera, edhe për personat që kërkojnë të emigrojnë në mënyrë të ligjshme.

Politikat e administratës janë përballur ndërkohë me kundërshtime ligjore. Së fundmi, një gjykatë amerikane rrëzoi një masë që pezullonte vizat e emigracionit për shtetasit e 75 vendeve, duke vlerësuar se administrata kishte tejkaluar kompetencat e saj.

Deri tani nuk është bërë e ditur se kur do të rifillojnë intervistat e pezulluara për vizat e emigracionit.