Pilulat kundër obezitetit mbërrijnë në Evropë, pas suksesit të madh në SHBA

Pas suksesit të madh në Shtetet e Bashkuara, trajtimet orale kundër obezitetit po bëhen pjesë e tregut evropian. Dy kompani farmaceutike gjigante, Novo Nordisk dhe Eli Lilly, po garojnë për të dominuar tregun e ri.

Nuk ka më nevojë për injeksione për trajtimin e obezitetit. Tashmë, pacientët mund të marrin trajtimin edhe në formën e një pilule. Në këtë treg të ri po përballen gjigantja daneze Novo Nordisk, me Wegovy, dhe kompania amerikane Eli Lilly, me orforglipron.

Pas suksesit në SHBA, të dyja kompanitë po përpiqen të konsolidojnë pozitat e tyre edhe në Evropë.

Për momentin, garën e kryeson Novo Nordisk. Pilula Wegovy ishte tashmë e disponueshme në farmacitë britanike disa javë më parë. Pjesa tjetër e Evropës pritet ta ndjekë. Muajin e kaluar, Komisioni Evropian i dha miratimin kompanisë daneze, ndërsa pilula do të hyjë në tregun evropian fillimisht në Gjermani. Ndërkohë, kompania duhet të kalojë ende procedurat përkatëse në Zvicër.

Eli Lilly, nga ana tjetër, është ende në fazat e para. Kompania amerikane është në pritje të vendimeve nga rreth 40 shtete, përfshirë Zvicrën. Deri tani, vetëm Mbretëria e Bashkuar i ka dhënë miratimin trajtimit.

Edhe në aspektin e shitjeve, Novo Nordisk është përpara. Kompania raportoi të ardhura prej rreth 400 milionë frangash nga ky trajtim në tremujorin e dytë të vitit 2026, krahasuar me pak më pak se 80 milionë franga për konkurrentin amerikan.

Mjekët e shohin me entuziazëm, por edhe me kujdes

Mjekët po e ndjekin me interes ardhjen e këtyre trajtimeve të reja, por edhe me një dozë kujdesi. Dy endokrinologë nga spitalet CHUV dhe HUG, të intervistuar nga RTS, vlerësojnë disa avantazhe të trajtimit oral, veçanërisht përdorimin më të lehtë dhe koston.

Megjithatë, ata theksojnë se, të paktën për momentin, efektiviteti i trajtimeve orale është më i ulët se ai i trajtimeve me injeksione.

Frika nga gjilpërat shpesh përmendet si një nga arsyet pse pacientët mund të preferojnë pilulat. Por, sipas dy specialistëve, situata është më e nuancuar. Pacientët që refuzojnë trajtimin ose ankohen për të vetëm për shkak të injeksioneve përbëjnë një pakicë shumë të vogël.

Edhe pilulat kanë disavantazhet e tyre. Ndërsa injeksioni bëhet një herë në javë, pilula duhet të merret çdo ditë.

Në këtë aspekt, trajtimi i Eli Lilly ka një avantazh të vogël: orforglipron mund të merret me ose pa ushqim. Në të kundërt, forma orale e Wegovy duhet të merret në mëngjes, para ngrënies, pirjes së lëngjeve apo marrjes së barnave të tjera.

Nuk është një kurë mrekullie

Rreziqet që lidhen me këto pilula të reja janë të ngjashme me ato të trajtimeve me injeksione. Specialistët paralajmërojnë se këto medikamente nuk duhet të konsiderohen si një “kurë mrekullie”.

Pesha e trupit nuk është treguesi i vetëm i një organizmi të shëndetshëm, theksojnë endokrinologët.

Këto medikamente përshpejtojnë ndjenjën e ngopjes, duke bërë që pacienti të konsumojë më pak ushqim. Si rezultat, humbet yndyrë, por mund të humbasë edhe masë muskulore. Për këtë arsye, trajtimi duhet të shoqërohet me një dietë të përshtatshme dhe aktivitet fizik.

Një tjetër rrezik, veçanërisht në rastet kur trajtimi merret pa ndjekje mjekësore, është rikthimi i peshës dhe përsëritja e fenomenit “yo-yo”, i njohur edhe nga dietat e ndryshme për dobësim/albinfo.ch/

---