Reshjet mbërrijnë në Zvicër, por thatësira nuk merr fund

Pas një periudhe të gjatë me mot të thatë dhe temperatura të larta, Zvicra pritet të përfshihet nga reshjet e shiut, por meteorologët paralajmërojnë se ato nuk do të jenë të mjaftueshme për ta zgjidhur problemin e thatësirës

Sipas parashikimeve të MeteoNews të raportuara nga 20 Minuten, reshjet e paralajmëruara mund të sjellin një lehtësim afatshkurtër, veçanërisht për vegjetacionin dhe shtresat sipërfaqësore të tokës. Megjithatë, deficiti i krijuar gjatë periudhës së thatë është shumë më i madh dhe kërkon reshje të vazhdueshme, transmeton albinfo.ch.

Situata mbetet problematike sidomos për tokën, pyjet, bujqësinë dhe burimet ujore. Në shumë zona, lagështia e tokës është e ulët, ndërsa prurjet e disa lumenjve dhe nivelet e ujërave kanë rënë ndjeshëm.

Edhe reshjet më intensive nuk janë domosdoshmërisht zgjidhja ideale. Kur toka është shumë e thatë, një pjesë e ujit nga reshjet e fuqishme mund të rrjedhë në sipërfaqe në vend që të depërtojë gradualisht në tokë. Për përmirësim më të qëndrueshëm do të nevojiteshin reshje të rregullta dhe të zgjatura në kohë.

Kështu, shiu i ditëve në vijim pritet të sjellë një pushim të mirëpritur nga thatësira, por nuk pritet një normalizim i qëndrueshëm i situatës ujore në Zvicër.

---