Suedia dhe Danimarka shtrëngojnë masat ndaj përdorimit të AI në shkolla

Rritja e përdorimit të inteligjencës artificiale në arsim ka nxitur Suedinë dhe Danimarkën të forcojnë masat kundër mashtrimit akademik, duke kërkuar një ekuilibër mes teknologjisë dhe integritetit të nxënësve.

Përdorimi gjithnjë e më i madh i inteligjencës artificiale (AI) në arsim po i shtyn qeveritë evropiane të rishikojnë mënyrën se si kjo teknologji përdoret në shkolla, veçanërisht për shkak të shqetësimeve për mashtrimin akademik, transmeton albinfo.ch.

Në Suedi, një studim i fundit ka treguar se rastet e nxënësve të pezulluar ose të paralajmëruar për përdorim të paautorizuar të mjeteve të inteligjencës artificiale janë rritur me 688 për qind gjatë periudhës 2023–2025.

Përballë kësaj rritjeje, qeveria suedeze ka nisur një rishikim zyrtar për të vlerësuar mënyrën se si shkollat po përballen me mashtrimin akademik të mundësuar nga teknologjia.

Danimarka vendos masa të reja

Edhe Danimarka ka ndërmarrë masa të reja për të kufizuar përdorimin e pakontrolluar të chatbotëve me inteligjencë artificiale në shkollat e mesme.

Sipas rregullave të reja, nxënësit nga mosha 16 deri në 19 vjeç do të duhet t’i mbrojnë gojarisht punimet e tyre, në mënyrë që të dëshmojnë se janë autorët e punimeve dhe se e kuptojnë përmbajtjen e tyre.

Gjithashtu, gjatë provimeve me shkrim, shkollat do të përdorin sisteme për monitorimin e ekraneve dhe masa të tjera teknike për të kufizuar qasjen e nxënësve në platformat e inteligjencës artificiale.

Megjithatë, autoritetet daneze nuk synojnë ndalimin e plotë të AI-së në arsim. Në disa projekte pilot, nxënësve u është lejuar përdorimi i mjeteve të inteligjencës artificiale gjatë përgatitjes për pjesën gojore të provimeve të gjuhës angleze.

Masat e reja tregojnë se debati për përdorimin e AI-së në arsim po bëhet gjithnjë e më i madh në Evropë dhe më gjerë.

Shtetet po përpiqen të gjejnë një ekuilibër mes përfitimeve që sjell inteligjenca artificiale në procesin mësimor dhe nevojës për të ruajtur integritetin akademik dhe vlerësimin real të njohurive të nxënësve./Albinfo.ch

---