Kartat Pokemon, mjet i ri për pastrimin e parave nga bandat kriminale

Kartat e rralla dhe me vlerë të lartë të Pokemonit po përdoren nga rrjetet kriminale si një mënyrë për të pastruar paratë e përfituara nga aktivitetet e paligjshme, ka paralajmëruar policia suedeze.

Sipas autoriteteve, gjatë hetimeve ndaj grupeve kriminale në Suedinë perëndimore dhe në kontrollet kufitare janë sekuestruar sasi të konsiderueshme kartash Pokemon. Vlera e disa prej këtyre kartave mund të arrijë në dhjetëra mijëra euro në tregun e koleksionistëve.

Policia dyshon se kriminelët përdorin paratë e aktiviteteve të paligjshme për të blerë kartat përmes platformave online, shpesh nëpërmjet marrëveshjeve private. Më pas, kartat mund t’u shiten koleksionistëve ose të nxirren në ankand, duke i kthyer paratë në të ardhura që mund të futen në sistemin financiar.

Gjatë operacioneve kundër grupeve të krimit të organizuar janë gjetur karta të mbyllura në paketimin origjinal, si dhe karta të certifikuara, krahas artikujve të tjerë të kontrabanduar.

Tamara Fuentes, zëdhënëse e Rajonit Policor Perëndimor, theksoi se platformat e parregulluara të shitblerjes krijojnë mundësi për transaksione private pa dokumentacion financiar.

Autoritetet suedeze u kanë bërë thirrje koleksionistëve dhe pronarëve të kartave me vlerë që të tregohen të kujdesshëm, veçanërisht kur përballen me blerës që propozojnë pagesa në para të gatshme.

Rasti tregon se grupet kriminale po kërkojnë gjithnjë e më shumë alternativa jashtë kanaleve tradicionale financiare për të lëvizur dhe legalizuar paratë e përfituara nga veprimtaria kriminale.