Pse vera e vitit 2026 u shpall më e nxehta në historinë e Zvicrës?

Nuk janë vetëm temperaturat rekord ato që e kanë bërë verën e vitit 2026 më të nxehtën e regjistruar ndonjëherë në Zvicër. Ekspertët kanë analizuar disa tregues, ku pesha më e madhe i është dhënë kohëzgjatjes së valëve të të nxehtit dhe numrit të ditëve me temperatura ekstreme.

Kur flitet për verën më të nxehtë të regjistruar ndonjëherë, shumë njerëz mendojnë se rekordi përcaktohet vetëm nga temperatura më e lartë e matur. Megjithatë, në rastin e Zvicrës, ekspertët përdorin disa tregues për të vlerësuar intensitetin e një vere. Kjo është arsyeja pse vera e vitit 2026 ka thyer rekordin e vendosur në vitin 2003, transmeton albinfo.ch.

Kohëzgjatja e valëve të të nxehtit është treguesi kryesor

Një nga elementet më të rëndësishme në këtë analizë është kohëzgjatja e valëve të të nxehtit. Sipas meteorologëve, temperaturat e larta nuk janë shfaqur vetëm për disa ditë, por kanë vazhduar për javë të tëra, duke e bërë verën e këtij viti të pazakontë.

Në disa rajone të Zvicrës, ditët me temperatura mbi 30 gradë Celsius kanë vazhduar pa ndërprerje për një periudhë rekord. Vetëm në Cyrih, meteorologët parashikuan deri në 14 ditë radhazi me temperatura prej 30 gradësh ose më shumë, duke rrezikuar rekordin historik të vitit 2003.

Nuk llogaritet vetëm temperatura maksimale

Një tjetër tregues i rëndësishëm është intensiteti i temperaturave gjatë një periudhe më të gjatë. Meteorologët analizojnë temperaturat mesatare ditore, temperaturat maksimale dhe numrin e ditëve me vapë ekstreme. Në disa stacione meteorologjike në Zvicër janë regjistruar rekorde të reja për muajin qershor, ndërsa në qytete si Bazeli, Neuchâteli, Cyrihu dhe Davosi janë shënuar temperaturat më të larta të regjistruara ndonjëherë gjatë një periudhe 10-ditore.

Matjet meteorologjike në Zvicër kanë një histori më shumë se 150-vjeçare

Për të krahasuar temperaturat, ekspertët i referohen të dhënave historike të mbledhura gjatë 125 deri në 160 viteve të fundit. Kjo u mundëson atyre të vlerësojnë nëse temperaturat aktuale përbëjnë një fenomen të zakonshëm apo një rekord të ri klimatik.

Ekspertët e klimës dhe Organizata Botërore Meteorologjike kanë paralajmëruar se valët e të nxehtit po bëhen gjithnjë e më të shpeshta, më intensive dhe më afatgjata si pasojë e ndryshimeve klimatike. Vera e vitit 2026 konsiderohet si një tjetër dëshmi e këtij fenomeni. /Albinfo.ch

 

---