Spektakolare: Miliona njerëz dynden në Spanjë për eklipsin total të Diellit

Spanja është kthyer në qendrën e vëmendjes së astronomëve dhe turistëve nga e gjithë bota, me miliona njerëz që po kërkojnë vendin ideal për të parë eklipsin total të Diellit.

Entuziazmi është i madh në të gjithë vendin, ndërsa forumet online janë mbushur me diskutime për kushtet e motit, mundësinë e vranësirave dhe pikat më të mira për vrojtimin e fenomenit, transmeton albinfo.ch.

Pjesë të mëdha të Spanjës do të përjetojnë një eklips total të Diellit, një ngjarje që nuk është parë në këtë vend prej më shumë se një shekulli.

“Do të jetë spektakolare”, ka thënë Cesar Gonzalez, astronom dhe komunikues shkencor në Planetariumin e Madridit. Sipas tij, një eklips total diellor është “një nga spektaklet më të mira në natyrë”.

Ai vetë ka planifikuar të udhëtojë drejt veriut, në drejtim të Burgosit, dhe të kërkojë një zonë të izoluar me horizont të hapur dhe qiell të pastër.

Deri në 6 milionë njerëz në shtegun e eklipsit

Autoritetet spanjolle vlerësojnë se deri në 6 milionë njerëz mund të mblidhen përgjatë shtegut të eklipsit, i cili shtrihet për rreth 200 kilometra, nga A Coruña në veriperëndim të Spanjës deri në ishullin e Majorkës.

Eklipsi total do të jetë gjithashtu i dukshëm në një pjesë të Portugalisë, si dhe në zona të Groenlandës dhe Islandës.

Ndërkohë, dhjetëra miliona njerëz në pjesë të tjera të Evropës Perëndimore do të mund ta shohin eklipsin si të pjesshëm, përfshirë në Mbretërinë e Bashkuar, Francë, Belgjikë, Zvicër dhe Italinë veriore.

Spanja konsiderohet një nga vendet më të favorshme për ta parë eklipsin total në Evropën kontinentale, sidomos për shkak të kushteve më të mira të motit.

Qindra mijëra turistë udhëtuan drejt Spanjës

Sipas të dhënave të raportuara nga mediat, rreth 460 mijë njerëz kanë udhëtuar drejt Spanjës posaçërisht për këtë ngjarje astronomike.

Hotelet kanë raportuar rezervime të bëra muaj më parë nga turistë që kanë ardhur edhe nga vende të largëta si Japonia dhe Shtetet e Bashkuara.

Më shumë se 300 mijë vizitorë pritet të shpërndahen në qytete dhe zona rurale të Spanjës, në kërkim të pikës më të mirë për të parë momentin kur Hëna do të mbulojë plotësisht Diellin.

Problemi është se faza e totalitetit do të zgjasë më pak se dy minuta, duke e bërë çdo sekondë të rëndësishme për ata që kanë udhëtuar mijëra kilometra për këtë moment.

Spanja përgatitet për një fluks të jashtëzakonshëm

Entuziazmi është reflektuar edhe në përgatitjet e autoriteteve. Shumë optika dhe farmaci kanë raportuar se syzet speciale për eklipsin janë shitur, ndërsa autoritetet janë përgatitur për rreth 1.5 milion udhëtime shtesë me automjete.

Për shkak të temperaturave që mund të arrijnë deri në 40 gradë Celsius dhe rrezikut të lartë për zjarre, në terren pritet të angazhohen më shumë se 24 mijë policë.

Edhe linja ajrore spanjolle Iberia ka përgatitur një fluturim çarter për të ndjekur eklipsin nga rreth 10 mijë metra lartësi.

Ndërkohë, edhe Muzeu Prado në Madrid i është bashkuar atmosferës, duke publikuar një video të krijuar me inteligjencë artificiale që paraqet mënyrën se si ndryshimi i dritës gjatë eklipsit mund të ndikojë në pamjen e kryeveprave të muzeut.

Për shumë prej vizitorëve, ky nuk është thjesht një udhëtim turistik, por një përvojë që mund të mbetet gjatë në kujtesë.

“Eklipsi i fundit që pashë ishte në vitin 1999, në veri të Parisit. Ishte fantastik dhe është diçka që dua ta ndaj me fëmijët e mi”, ka treguar një turiste franceze që ka udhëtuar drejt Spanjës me fëmijët e saj.

Ndërsa miliona njerëz përgatiten për spektaklin qiellor, sfida kryesore mbetet gjetja e një qielli të pastër dhe një horizonti të hapur. Për shumë prej tyre, edhe nëse duhet të udhëtojnë disa orë larg vendit ku kanë rezervuar hotelin, gjithçka ia vlen për vetëm pak çaste nën hijen e Hënës./Albinfo.ch

---