Pse zviceranët preferojnë të blejnë djathë të huaj?

Është një paradoks në një vend që është pothuajse sinonim me fjalën “djathë” që një numër gjithnjë e në rritje i konsumatorëve zgjedhin produktin e importuar, në vend të atij vendas.

Imagjinoni një zviceran që kërkon çokollatë të importuar në një supermarket, ndërsa raftet janë plot me varietete të prodhuara në Zvicër.

Ky duket një skenar pothuajse i pamundur për t’u kuptuar, veçanërisht duke pasur parasysh preferencën e gjatë të konsumatorëve zviceranë për produktet e tyre mbi ato të importuara.

Megjithatë, kjo është ajo që po ndodh me djathin.

Zvicra ka importuar sasi të kufizuara djathi për vite me radhë, veçanërisht që kur tregu u liberalizua në vitin 2007, duke i lejuar vendit të tregtojë me Bashkimin Evropian më lehtë.

Megjithatë, tani, për herë të parë në historinë e regjistruar të prodhimit të djathit zviceran, importet e djathit të vendit tejkalojnë vëllimin e eksporteve.

Kosto më e lartë

Duke pasur parasysh prodhimin e saj të famshëm botëror të qindra llojeve të djathrave – duke përfshirë Gruyère dhe Emmentaler – pse Zvicra importon sasi gjithnjë e në rritje të këtij produkti?

Ka disa arsye për të shpjeguar këtë fenomen.

Në rrënjë të kësaj qëndron ekonomia e thjeshtë: numri i fermave zvicerane të qumështit është zvogëluar ndjeshëm për shkak të rritjes së çmimit të qumështit, i cili nuk mbulon më kostot e prodhimit, shkruan thelocal, transmeton albinfo.ch.

Në të njëjtën kohë, çmimet janë rritur – jo vetëm për shkak të furnizimit më të ulët, por edhe për shkak të inflacionit.

Djathi i importuar, nga ana tjetër, i cili vjen kryesisht nga Franca, është më i lirë për konsumatorët.

Logjika e shëndoshë dikton se importimi i qumështit do ta zgjidhte këtë problem.

Megjithatë, kjo nuk është aq e thjeshtë sa duket.

Kjo sepse djathi këtu duhet të bëhet duke përdorur vetëm qumësht nga lopët zvicerane – përndryshe, nuk do të përcaktohet si “zviceran”, edhe nëse prodhohet në vend.

Kjo është bërë e qartë në vitin 2021, kur një bulmetore në Zvicrën lindore donte të importonte qumësht nga Gjermania për djathin e tyre.

Kjo kishte shkaktuar zemërim midis fermerëve zviceranë të qumështit dhe masa përfundimisht u anulua.

---