Italia goditet nga tërmeti, banorët dalin në rrugë

Foto Ilustrim

Instituti Kombëtar i Gjeofizikës dhe Vullkanologjisë (INGV) i Italisë ka regjistruar një tërmet me magnitudë 4.1, epiqendra e të cilit ishte në Pizzone, në provincën e Isernias (Molise), në një thellësi prej rreth 10 kilometrash.

Lëkundjet e tërmetit u ndjenë në të gjithë provincën dhe gjithashtu në Chieti, L’Aquila dhe Caserta teksa raportohet se shumë njerëz dolën në rrugë nga frika, transmeton albinfo.ch.

Një dridhje e dytë, me magnitudë 2.2, u regjistrua në të njëjtën zonë në orën 3:41 të mëngjesit, në një thellësi prej 9 kilometrash.

Deri më tani nuk janë raportuar të lënduar ose dëme.

“Jam në kontakt të vazhdueshëm me Mbrojtjen Civile rajonale. Për fat të mirë, nga një inspektim fillestar dhe i rëndësishëm, nuk është gjetur asnjë dëm në njerëz apo pronë. Njerëzit qëndruan në rrugë deri vonë, kryesisht për shkak të gjendjes së ankthit që u krijua”, tha kryetari i bashkisë së Pizzone-s, Vincenzo Di Cristofano.