Një në tre persona në botë nuk përballon një dietë të shëndetshme

unsplash

Kostoja e një diete të shëndetshme është rritur me 25% gjatë pesë viteve të fundit, duke arritur në 4.28 dollarë për person në ditë, ndërsa 2.69 miliardë njerëz, ose pothuajse një në tre banorë të botës, nuk kanë mundësi ta përballojnë atë. Kështu thuhet në raportin më të fundit të Organizatës së Kombeve të Bashkuara për Ushqimin dhe Bujqësinë (FAO).

Sipas FAO-s, sfida globale nuk është mungesa e ushqimit, por qasja në ushqime të pasura me vlera ushqyese. Organizata vlerëson se rritja e prodhimit lokal, investimet në infrastrukturë dhe orientimi i subvencioneve drejt ushqimeve më ushqyese mund të ulin ndjeshëm koston e një diete të shëndetshme.

Raporti paralajmëron gjithashtu se gjatë vitit 2026 siguria ushqimore mund të ndikohet nga faktorë si fenomeni klimatik El Niño dhe tensionet në tregtinë globale të plehrave kimike.

Ekspertët theksojnë se problemi nuk është vetëm uria, por edhe cilësia e ushqimit, duke paralajmëruar se bota po përballet gjithnjë e më shumë me “pasiguri ushqyese”, ku shumë njerëz konsumojnë mjaftueshëm kalori, por jo ushqim me vlera të mjaftueshme ushqyese.