Dua Lipa vendos rekord historik në Spotify, artistja e parë me katër albume mbi 5 miliardë dëgjime

Ylli botëror me rrënjë shqiptare vazhdon të dominojë skenën muzikore globale me një tjetër arritje të jashtëzakonshme

Këngëtarja me famë botërore Dua Lipa ka shënuar një tjetër moment historik në karrierën e saj, duke vendosur një rekord të ri në platformën e transmetimit muzikor Spotify, përcjell albinfo.ch. 

Sipas statistikave të publikuara së fundmi, Dua Lipa është bërë artistja e parë femër në histori që arrin të ketë katër albume me mbi pesë miliardë transmetime secili në Spotify.

Ky rekord konfirmon ndikimin e jashtëzakonshëm të artistes në industrinë muzikore dhe dëshmon se katalogu i saj vazhdon të jetë ndër më të dëgjuarit në mbarë botën.

Që nga albumi i saj debutues e deri te suksesi global i “Future Nostalgia” dhe projekteve të fundit, Dua Lipa ka ndërtuar një karrierë të qëndrueshme, duke dominuar listat muzikore ndërkombëtare.

Hite si Levitating, Don’t Start Now dhe New Rules vazhdojnë të regjistrojnë miliona dëgjime, duke mbetur ndër këngët më të pëlqyera të muzikës pop edhe vite pas publikimit.

Fakti që katër albume të saj kanë kaluar pragun prej pesë miliardë dëgjimesh secili tregon se suksesi i Dua Lipës nuk lidhet vetëm me momentet virale, por me një ndikim të qëndrueshëm dhe afatgjatë në skenën muzikore ndërkombëtare.

Ky është një tjetër vlerësim i rëndësishëm për artisten me rrënjë shqiptare, e cila vazhdon të vendosë standarde të reja në industrinë globale të muzikës./Albinfo.ch 

---