Suplementi pa recetë që përdoret për dhimbjet e kyçeve, mund të lidhet me përkeqësimin e demencës

Një studim i ri ka ngritur pikëpyetje mbi përdorimin afatgjatë të glukozaminës, një suplement i përdorur gjerësisht pa recetë për lehtësimin e problemeve me kyçet.

Sipas hulumtimit, përdorimi i rregullt i këtij suplementi mund të shoqërohet me një rrezik më të lartë të përparimit të demencës. Studiuesit analizuan të dhënat shëndetësore të afro 60 mijë personave të mbledhura gjatë periudhës 2012–2024, duke krahasuar gjendjen e pacientëve që përdornin glukozaminë me ata që nuk e merrnin atë.

Rezultatet treguan se përdoruesit e rregullt të glukozaminës kishin rreth 25% më shumë gjasa për të zhvilluar demencë krahasuar me personat që nuk e përdornin suplementin.

Gjithashtu, te pacientët që tashmë kishin demencë, përdorimi i saj u lidh me një rritje të rrezikut të vdekshmërisë gjatë periudhës së monitorimit.

Studiuesit analizuan edhe mekanizmat e mundshëm biologjikë dhe sugjeruan se glukozamina mund të ndikojë në procese që lidhen me dëmtimin e funksioneve neurologjike në tru.

Megjithatë, autorët e studimit theksojnë se këto rezultate nuk provojnë një lidhje të drejtpërdrejtë shkak-pasojë dhe se nevojiten kërkime të mëtejshme për të kuptuar më mirë ndikimin e suplementit.

Ekspertët këshillojnë që pacientët të mos ndryshojnë përdorimin e glukozaminës pa u konsultuar me mjekun, pasi duhen më shumë të dhëna për të përcaktuar rreziqet dhe përfitimet e saj afatgjata.