Çfarë çoi në anulimin e bisedimeve SHBA–Iran në Zvicër?

Shtyhen bisedimet SHBA–Iran në Zvicër, arsyet mbeten të paqarta

Takimi mes delegacioneve të Shteteve të Bashkuara dhe Iranit nuk do të zhvillohet sipas planit në Zvicër. Arsyet e shtyrjes mbeten ende të paqarta, ndërsa nuk dihet nëse bisedimet do të mbahen në një datë tjetër apo në një vend tjetër, përcjell albinfo.ch.

Bisedimet e planifikuara mes Shteteve të Bashkuara dhe Iranit në Bürgenstock të Zvicrës janë shtyrë, njoftoi Departamenti Federal i Punëve të Jashtme (EDA).

Sipas autoriteteve zvicerane, konferenca nuk do të mbahet siç ishte paraparë, ndërsa ende nuk është bërë e ditur nëse takimi do të zhvillohet gjatë ditëve në vijim apo do të zhvendoset në një lokacion tjetër.

Shtyrja erdhi pasi nga Uashingtoni u bë e ditur se nënpresidenti amerikan, JD Vance, nuk do të udhëtojë për momentin drejt Zvicrës. Ai kishte lënë të kuptohej më herët se ekzistonin vështirësi logjistike nga pala iraniane.

Megjithatë, mediat ndërkombëtare përmendin edhe arsye të mundshme politike. Agjencia Associated Press (AP), duke cituar televizionin arab Al Mayadeen, raportoi se Irani mund ta ketë shtyrë takimin në shenjë proteste ndaj vazhdimit të sulmeve izraelite në Liban. Kjo nuk është konfirmuar zyrtarisht.

Pavarësisht shtyrjes së takimit, afati 60-ditor që SHBA-ja dhe Irani i kanë dhënë vetes për të arritur një marrëveshje mbi çështjet e diskutueshme, veçanërisht programin bërthamor iranian, ka hyrë tashmë në fuqi. /Albinfo.ch

---