Ky shtet evropian godet rrjetin e vjedhjes së makinave, 11 shqiptarë përfundojnë në pranga

11 shqiptarë në pranga, dyshohen për përfitime mbi 1 milion euro nga vjedhja e automjeteve

Policia greke ka goditur një organizatë kriminale të përfshirë në vjedhjen, falsifikimin dhe shitjen e automjeteve në zona të ndryshme të Athinës, duke arrestuar 13 persona gjatë një operacioni të gjerë policor, transmeton albinfo.ch.

Operacioni u zhvillua nga Departamenti i Hetimit dhe Ndjekjes së Krimeve Spata-Artemis, me mbështetjen e njësive të tjera policore në Athinë. Të arrestuarit janë të moshës 22 deri në 38 vjeç, prej të cilëve 11 janë shtetas shqiptarë dhe dy grekë.

Sipas autoriteteve greke, grupi kriminal vepronte që nga marsi i vitit 2023 dhe merrej me vjedhjen e automjeteve në rajone të ndryshme të Athinës. Pas vjedhjes, anëtarët e organizatës ndryshonin numrat e shasisë dhe falsifikonin dokumentacionin, me qëllim që automjetet të shiteshin si të ligjshme.

Hetimet zbuluan se të dyshuarit hiqnin pjesët origjinale identifikuese të automjeteve dhe vendosnin numra të falsifikuar, duke i “legalizuar” ato për treg.

Po ashtu, anëtarët e grupit dyshohet se bënin deklarime të rreme për vjedhjen e automjeteve, me qëllim përfitimin e kompensimeve nga kompanitë e sigurimeve.

Gjatë hetimeve disamujore, policia identifikoi dhe sekuestroi 36 automjete, prej të cilave 19 rezultuan të vjedhura dhe me dokumente të falsifikuara. Automjetet iu kthyen pronarëve të tyre ligjorë.

Në kontrollet e kryera në banesat e të arrestuarve, autoritetet sekuestruan gjashtë automjete, pajisje për kopjimin e çelësave të makinave, sisteme diagnostikuese për automjete, mjete speciale për hapjen e bravave, pajisje gjeolokacioni, telefona celularë, kompjuterë, dy pistoleta imituese, një thikë dhe rreth 30 mijë euro para të gatshme.

Sipas policisë, gjatë hetimeve janë dokumentuar 33 raste të vjedhjes së automjeteve dhe nëntë raste të raportimeve të rreme për vjedhje.

Autoritetet greke vlerësojnë se përfitimi financiar i organizatës kriminale arrin në rreth një milion euro.

Të arrestuarit janë dërguar para prokurorisë kompetente, ndërsa hetimet për zbardhjen e plotë të aktivitetit të grupit kriminal po vazhdojnë./Albinfo.ch.

---