Përfundon numërimi i votave në përfaqësi diplomatike, VV-ja merr mbi 83 për qind

Partia në pushtet dominon bindshëm votimin e diasporës në ambasada dhe konsullata, ndërsa PDK-ja dhe LDK-ja renditen pas saj

Ka përfunduar numërimi i të gjitha votave të hedhura në përfaqësitë diplomatike të Kosovës jashtë vendit, me Lëvizjen Vetëvendosje që ka shënuar një fitore të thellë, transmeton albinfo.ch.

Sipas rezultateve zyrtare të publikuara nga Komisioni Qendror i Zgjedhjeve, Lëvizja Vetëvendosje ka siguruar 18,789 vota, që përfaqësojnë 83.28 për qind të votave të vlefshme të hedhura në ambasada dhe konsullata.

Në vendin e dytë është renditur Partia Demokratike e Kosovës me 1,608 vota ose 7.13 për qind.

Lidhja Demokratike e Kosovës ka marrë 1,490 vota, që përbëjnë 6.60 për qind të votave, duke u renditur e treta.

Ndërkaq, Aleanca për Ardhmërinë e Kosovës ka siguruar 464 vota apo 2.06 për qind të mbështetjes së votuesve në përfaqësitë diplomatike.

Rezultatet konfirmojnë mbështetjen e lartë që Lëvizja Vetëvendosje gëzon në mesin e mërgatës kosovare, duke dominuar bindshëm procesin e votimit të zhvilluar në ambasadat dhe konsullatat e Kosovës në vende të ndryshme të botës.

Pas përfundimit të këtij procesi, vëmendja tashmë mbetet te numërimi i votave të ardhura përmes postës, të cilat pritet të kenë ndikim në rezultatet përfundimtare të zgjedhjeve dhe në ndarjen finale të mandateve në Kuvendin e Kosovës./Albinfo.ch

---