Shqipëria vijon përgatitjet për Luksemburgun

Kombëtarja shqiptare ka zhvilluar stërvitjen e radhës në “Shtëpinë e Futbollit”, ndërsa stafi teknik po monitoron gjendjen e Myrto Uzunit dhe Anis Mehmetit para miqësores me Luksemburgun.

 

 

Kombëtarja shqiptare ka vazhduar përgatitjet për ndeshjen miqësore ndaj Luksemburgut, duke zhvilluar seancën e radhës stërvitore në “Shtëpinë e Futbollit”.

Stërvitja u organizua në dy grupe, ku futbollistët që u aktivizuan në ndeshjen e fundit zhvilluan program rikuperues, ndërsa pjesa tjetër e ekipit u stërvit me intensitet të plotë nën drejtimin e stafit teknik.

Një pikëpyetje mbetet gjendja e sulmuesit Myrto Uzuni, i cili nuk u stërvit me grupin për shkak të një gjendjeje gripale. Stafi mjekësor po e vlerëson situatën e tij, ndërsa nuk përjashtohet mundësia që ai të zhvillojë një stërvitje të diferencuar gjatë ditës.

Probleme shëndetësore ka shfaqur edhe Anis Mehmeti, i cili ka kaluar një gjendje gripale gjatë natës dhe do të monitorohet në orët e ardhshme për të përcaktuar gatishmërinë e tij.

Kuqezinjtë do të zhvillojnë të nesërmen stërvitjen zyrtare në stadiumin “Air Albania”, duke hyrë në fazën finale të përgatitjeve para sfidës me Luksemburgun. Para seancës stërvitore, trajneri Rolando Maran dhe një futbollist i Kombëtares do të paraqiten në konferencën zyrtare për media.

---