FC Kosova München siguron ngjitjen në Bezirksliga

Klubi shqiptar në Mynih feston një sukses të rëndësishëm sportiv

FC Kosova München ka arritur një sukses të madh duke siguruar promovimin nga Kreisliga në Bezirksliga, një hap i rëndësishëm në rrugëtimin e klubit në futbollin gjerman, transmeton albinfo.ch.

Në ndeshjen vendimtare dhe festën e kampionatit morën pjesë edhe Konsulli i Përgjithshëm i Kosovës në Mynih, Afrim Nura, së bashku me konsujt Naser Bejtullahu dhe Afrim Deliu, të cilët përgëzuan klubin për këtë arritje.

Ngjitja në një ligë më të lartë vlerësohet si rezultat i punës së palodhshme të futbollistëve, stafit drejtues dhe mbështetjes së vazhdueshme të tifozëve dhe komunitetit shqiptar në Bavari.

Prej vitesh, FC Kosova München konsiderohet një nga klubet më të rëndësishme sportive të shqiptarëve në Gjermani, duke shërbyer si ambasador i sportit dhe i komunitetit shqiptar në Mynih./Albinfo.ch

---