Shaqiri zbulon golin më të bukur me Zvicrën: Askush s’do ta ndalte atë goditje

Ylli i Baselit thotë se goli ndaj Skocisë në Euro 2024 ishte më spektakolari, flet edhe për rikthimin e mundshëm te Kombëtarja

Xherdan Shaqiri ka zhvilluar 125 ndeshje me Përfaqësuesen e Zvicrës, duke realizuar 32 gola, shumë prej të cilëve kanë qenë spektakolarë dhe të paharrueshëm për tifozët, përcjell albinfo.ch.

34-vjeçari ka folur së fundmi për golat më të bukur të karrierës së tij me Zvicrën, në një intervistë për mediumin “The Athletic”. Sulmuesi i Baselit ka veçuar golin e shënuar ndaj Skocisë në Euro 2024, duke e cilësuar si më të bukurin.

“Ka qenë një prej golave më të bukur që kam shënuar ndonjëherë”, ka deklaruar Shaqiri, duke shtuar se sipas tij asnjë portier nuk do të kishte mundur ta ndalte atë goditje.

Shaqiri kujtoi edhe golin e famshëm ndaj Polonisë në Euro 2016, një tjetër realizim që mbetet ndër më të bukurit në historinë e kampionateve evropiane.

“Ndonjëherë mendoj se duhet ta provoj sërish atë gjuajtje. Më pëlqen të rrezikoj sepse më bën të paparashikueshëm”, u shpreh ai.

Dy herë fitues i Ligës së Kampionëve me Bayern Munichun dhe Liverpoolin, Shaqiri u pyet gjithashtu nëse mund të rikthehet te Përfaqësuesja e Zvicrës për Kupën e Botës që do të organizohet këtë verë në Kanada, Meksikë dhe SHBA.

“Asnjëherë mos thuaj kurrë, por për momentin nuk shoh kthim te Zvicra”, theksoi Shaqiri, i cili u pensionua nga Kombëtarja pas përfundimit të Kampionatit Evropian 2024 në Gjermani./Albinfo.ch

---