Samiti i Diasporës: Begaj nderon figurat shqiptare, Lorik Cana merr “Urdhrin e Skënderbeut”

Në Pallatin e Kongreseve u zhvillua Samiti i katërt i Diasporës, ku Presidenti i Republikës, Bajram Begaj, vlerësoi disa personalitete të shquara të diasporës shqiptare për kontributin e tyre në fusha të ndryshme.

Një nga momentet kryesore të ceremonisë ishte dekorimi i ish-kapitenit të Kombëtares, Lorik Cana, i cili u nderua me “Urdhrin e Skënderbeut”. Në fjalën e tij, Cana theksoi se gjithmonë ka synuar të përfaqësojë me krenari shqiptarët dhe se ky vlerësim është një emocion i veçantë jo vetëm për të, por edhe për familjen dhe njerëzit që e kanë frymëzuar gjatë jetës.

Gjatë ceremonisë u vlerësuan edhe figura të tjera të diasporës. Gentian Toshkëzi mori titullin “Kalorës i Urdhrit Suprem të Shqiponjës”, ndërsa Klarita Gërxhani dhe Shqiponjë Telhaj u dekoruan me “Kalorës i Urdhrit të Lisit Akademik”. Po ashtu, Markus Schuhmann dhe Andres Lindberg u nderuan me “Oficer i Urdhrit të Skënderbeut”.