NASA nis misionin Artemis II, astronautët rikthehen drejt Hënës pas 53 vjetësh

Raketa do të lansohet nga Kennedy Space Center në Florida dhe do të kryejë një xhiro rreth Hënës pa u ulur në sipërfaqe. Misioni do të zgjasë 10 ditë dhe shënon fluturimin e parë me astronautë drejt Hënës pas më shumë se pesë dekadash.

NASA ka nisur për herë të parë pas 53 vjetësh një mision të ri drejt Hënës me astronautë, duke shënuar një moment historik në programin hapësinor amerikan, përcjell albinfo.ch.

Bëhet fjalë për misionin Artemis II, i cili ka zgjuar interesim të madh në mbarë botën, me shumë persona që po e ndjekin nga afër lansimin e raketës së planifikuar për sot.

Astronautët Reid Wiseman, Victor Glover, Christina Koch dhe Jeremy Hansen gjenden tashmë në kapsulën Orion, e cila do të dërgohet në hapësirë nga raketa që do të lansohet nga Kennedy Space Center në Florida.

Sipas planit të misionit, raketa do të bëjë një xhiro rreth Hënës, por nuk do të ulet në sipërfaqen e saj. Artemis II do të zgjasë rreth dhjetë ditë, duke u konsideruar si misioni i parë me astronautë drejt Hënës pas më shumë se gjysmë shekulli.

Para lansimit, Presidenti i SHBA-së, Donald Trump, ka shpërndarë një mesazh në platformën “TruthSocial”, duke e cilësuar këtë mision si një rikthim historik të Amerikës në Hënë.

“Për herë të parë në mbi 50 vjet, Amerika do të kthehet në Hënë! Artemis II, ndër raketat më të fuqishme që është ndërtuar ndonjëherë, do të dërgojë astronautët tanë të guximshëm më larg në hapësirë se që ka shkuar ndonjëherë njeriu…”, ka shkruar Trump.

Ndërkohë, pak para nisjes janë raportuar probleme teknike me sistemin e ndërprerjes, i cili shërben për shkatërrimin e raketës gjatë fluturimit në rast se ajo del jashtë trajektores, për të shmangur rrezikun ndaj njerëzve në Tokë.

Megjithatë, sipas raportimeve, defekti është rregulluar dhe lansimi pritet të realizohet sipas planit.

Misioni Artemis II konsiderohet një hap i rëndësishëm drejt kthimit të njeriut në Hënë dhe përgatitjeve për misionet e ardhshme, që synojnë edhe uljen në sipërfaqe./Albinfo.ch

 

---