BE paralajmëron: Çmimet e naftës do të mbeten të larta edhe pas përfundimit të konfliktit me Iranin

@pixabay

Bashkimi Evropian ka bërë të ditur se çmimet e naftës dhe gazit nuk pritet të bien shpejt, edhe në rast se lufta me Iranin përfundon. Sipas zyrtarëve evropianë, tregjet globale të energjisë po përballen me presione të mëdha dhe furnizimet mbeten të kufizuara.

Komisioneri për Energji, Dan Jørgensen, theksoi se aktualisht nuk ka mungesa të menjëhershme të naftës apo gazit në vendet e BE-së, por situata mbetet e tensionuar. Ai përmendi veçanërisht presionin mbi furnizimet me karburant dhe kufizimet në tregun global të gazit, të cilat po ndikojnë në rritjen e çmimeve të energjisë elektrike.

Sipas tij, edhe nëse arrihet paqe shumë shpejt, rikthimi në nivele normale të çmimeve nuk do të ndodhë në një periudhë të afërt.

Ndërkohë, BE po përgatit masa për të ndihmuar familjet dhe bizneset të përballojnë kostot e larta të energjisë. Që nga fillimi i konfliktit, çmimet janë rritur ndjeshëm – rreth 70% për gazin dhe 60% për naftën, ndërsa shpenzimet për importet e karburanteve fosile janë rritur me miliarda euro.

Komisioni Evropian po shqyrton edhe uljen e taksave për energjinë elektrike dhe mundësinë e ndarjes së çmimit të gazit nga ai i energjisë elektrike, për të lehtësuar barrën për konsumatorët.

Po ashtu, nuk përjashtohet vendosja e një takse të përkohshme për kompanitë që kanë përfituar nga rritja e çmimeve.

Zyrtarët e BE-së theksojnë rëndësinë e bashkëpunimit mes vendeve anëtare për të shmangur masa të pakoordinuara që mund të destabilizojnë tregun.

Në të njëjtën kohë, BE po vazhdon përpjekjet për të reduktuar varësinë nga gazi rus dhe për të siguruar burime alternative energjie nga vende të tjera si SHBA, Azerbajxhani dhe Algjeria.