Publikohet lista e miliarderëve më të pasur të botës për vitin 2026

foto ilustrim

Forbes ka publikuar sot edicionin e 40-të vjetor të listës së saj “Miliarderët e Botës”, duke treguar renditjen e personave më të pasur në planet.

Gjatë 12 muajve të fundit, pasuria e miliarderëve ka shënuar rritje të jashtëzakonshme, ndërsa numri i tyre ka arritur në 3,428 persona – rreth 400 më shumë se rekordi i vitit të kaluar, dhe niveli më i lartë që nga krijimi i listës në vitin 1987. Së bashku, këta miliarderë zotërojnë pasuri prej 20.1 trilionë dollarësh, nga 16.1 trilionë që ishte një vit më parë. Ndër ta, 20 persona kanë pasuri mbi 100 miliardë dollarë.

Elon Musk kryeson listën për herë të dytë radhazi, me një pasuri të vlerësuar rreth 839 miliardë dollarë, duke e bërë personin më të pasur në historinë e regjistruar. Pasuria e tij është rritur me gati 500 miliardë dollarë falë performancës së lartë të Tesla dhe SpaceX, e cila planifikon të dalë në bursë gjatë këtij viti. Musk është gjithashtu personi i parë që ka kaluar nivelin e 800 miliardë dollarëve, duke u afruar drejt titullit të trilionerit të parë në botë.

Larry Page, bashkëthemelues i Google, renditet i dyti me 257 miliardë dollarë, i ndjekur nga Sergey Brin me 237 miliardë dollarë. Jeff Bezos i Amazon zë vendin e katërt (224 miliardë dollarë), ndërsa Mark Zuckerberg i Meta-s mbyll pesëshen e parë me 222 miliardë dollarë.
Pasuria e ish-presidentit Donald Trump u rrit me 27%, duke arritur rreth 6.5 miliardë dollarë, kryesisht nga investimet në kriptovaluta dhe anulimi i dënimit për mashtrim në Nju Jork. Ai renditet në vendin e 645-të globalisht.

Lista e vitit 2026 përfshin gjithashtu 390 miliarderë të rinj, mes tyre: Dr. Dre, Beyoncé Knowles-Carter, CEO i ri i Berkshire Hathaway Greg Abel, tenisti legjendar Roger Federer, Kimbal Musk dhe Nicole Shanahan.
Në nivel global, Shtetet e Bashkuara kryesojnë me 989 miliarderë dhe pasuri totale 8.4 trilionë dollarë, ndjekur nga Kina me 539 dhe India me 229.
Në grupin ekskluziv të miliarderëve me pasuri mbi 100 miliardë dollarë janë 20 persona, që zotërojnë 3.8 trilionë dollarë – pothuajse një e pesta e pasurisë së të gjithë miliarderëve.

Nga ana tjetër, 89 individë kanë dalë nga lista këtë vit, përfshirë Jared Isaacman, Charles Cohen dhe 39 të tjerë që kanë ndërruar jetë.