Etnik Shala shkëlqen në Milano Fashion Week

Stilisti kosovar prezanton koleksionin e tij në Milano, duke tërhequr vëmendjen e publikut ndërkombëtar

Stilisti kosovar Etnik Shala ishte ndër emrat që tërhoqi vëmendje në edicionin e këtij viti të Milano Fashion Week, i mbajtur më 25 shkurt në ambientet historike të Chiostri di San Barnaba në Milan, transmeton albinfo.ch.

Koleksioni i tij u veçua mes prezantimeve të stilistëve nga vende të ndryshme, duke konfirmuar Shalën si një nga zërat në rritje të modës bashkëkohore nga Kosova.

Vetë stilisti e përshkroi prezantimin në Milano si një moment të veçantë në karrierën e tij, duke theksuar se skenat ndërkombëtare janë një vlerësim i drejtë për punën e dizajnerëve.

Në prezantimin e tij morën pjesë mbi 300 të ftuar, të cilët reaguan me admirim ndaj koleksionit, duke e shndërruar sfilatën e Shalës në një nga momentet më të spikatura të mbrëmjes. /Albinfo.ch

---