Kosovari në Serbi përballet me maltretim dhe i konfiskohen 2,500 euro për fotografitë e babait dhe figurat e UÇK-së

Rilind Krasniqi, një mërgimtar kosovar që jeton në Gjermani, raporton se është përballur me bastisje dhe keqtrajtim nga autoritetet serbe gjatë një udhëtimi në Serbi. Ai thotë se është mbajtur për rreth një orë nën kontroll, ndërsa pajisjet e tij personale janë kontrolluar dhe i janë marrë disa sende, përfshirë 2,500 euro.

Sipas Krasniqit, bastisja lidhej me fotografi që ai kishte në telefon dhe në profilin e tij në Facebook. Mes tyre ishin imazhe të babait të tij, i cili ka qenë pjesëtar i Ushtrisë Çlirimtare të Kosovës, dhe figura të njohura të luftës për liri në Kosovë, si Adem Jashari, Vesel Aruci dhe Mujë Krasniqi.

Ai apelon që qytetarët të tregohen të kujdesshëm dhe të shmangin udhëtimet nëpër Serbi, duke theksuar se personat me lidhje me UÇK-në ose figurat e saj mund të përballen me diskriminim ose kontrolle të ashpra.

Ky rast nuk është i izoluar. Së fundmi, një tjetër qytetar kosovar, Mitehat Llozhani, u arrestua nga autoritetet serbe në pikën kufitare Batrovci, pranë Kroacisë. Ministria e Punëve të Jashtme e Kosovës ka kritikuar Serbinë për shkelje të të drejtave ndërkombëtare dhe ka kërkuar ndërhyrjen e komunitetit ndërkombëtar.