Në Zvicër shënohet rritje rekord e incidenteve me pasagjerë në avionë

Pasagjerë të padisiplinuar, 2 mijë raste në fluturime gjatë 2025

Gjatë vitit 2025 është regjistruar një rritje e madhe e incidenteve me pasagjerë problematikë në bord të linjave ajrore që operojnë në Zvicër, përfshirë SWISS, Edelweiss dhe EasyJet Switzerland, transmeton albinfo.ch.

Referuar të dhënave zyrtare, janë raportuar gjithsej 2,021 raste, që përbën një rritje prej 17 për qind krahasuar me vitin paraprak, duke shënuar një rekord të ri.

Sjelljet e papërshtatshme variojnë nga fyerje verbale ndaj ekuipazhit, deri te akte dhune dhe ngacmime seksuale. Gjithashtu, shumë pasagjerë shpërfillin udhëzimet e sigurisë të stafit, shkelin ndalimin e duhanit dhe rregullat për konsumimin e alkoolit.

Zyra Federale e Aviacionit Civil (FOCA) ka shqiptuar 166 gjoba, me vlera nga 400 deri në 1,000 franga zvicerane. Megjithatë, autoritetet theksojnë se identifikimi i shkelësve që jetojnë jashtë vendit e bën ndjekjen ligjore dukshëm më të vështirë. /Albinfo/ch

---