Regjisori shqiptar fiton çmimin prestigjioz ‘Luani i Argjendtë’

Mario Banushi, regjisori shqiptar më i ri, triumfon me ‘Luani i Argjendtë’

Mario Banushi është regjisori shqiptar i formuar në Athinë, ka fituar të çmimin prestigjioz “Luani i Argjendtë”, duke u bërë gjithashtu regjisori më i ri që e merr këtë nder. Një arritje që thekson rrugëtimin e jashtëzakonshëm të një talenti të ri, i cili po tërheq vëmendjen e skenës botërore, transmeton albinfo.ch.

Juria, e drejtuar nga aktori Willem Dafoe, e ka vlerësuar teatrin e Banushit si “poetik dhe intim, që transformon heshtjet dhe veprimet e përditshme në ceremoni të përbashkëta, duke përshkuar kujtimin, dhimbjen dhe traditat familjare, me një gjuhë politike të mprehtë”.

Pas fitores, Banushi ka përshëndetur familjen e tij dhe rrugëtimin personal që e ka çuar deri në këtë çmim të rëndësishëm. Në motivacionin e Bienales, theksohet se ai përdor heshtjen si një element komunikimi të fuqishëm, ndërsa teatrin e tij e përshkon inteligjenca politike dhe eksplorimi i kontradiktave të kohës sonë, transmeton tutje albinfo.ch.

I lindur në vitin 1998 në Shqipëri, Banushi u vendos me familjen në Greqi, ku përfundoi Konservatorin e Dramës në Athinë. Debutimin e tij e bëri gjatë pandemisë me shfaqjen “Ragada”, e ndjekur nga “Mirupafshim, Lindita” dhe trilogjia e tij e njohur “Taverna Mirësia”. Veprat e tij janë pritur me entuziazëm në Teatrin Kombëtar të Greqisë dhe kanë nisur turne ndërkombëtar, duke tërhequr vëmendjen e mediave të njohura si New York Times, BBC, The Guardian, Le Monde dhe Libération.

Banushi ka theksuar se synon të krijojë teatër që ndjehet, jo vetëm kuptohet: “Dua të imagjinoni historitë tuaja, të shihni jetën tuaj dhe më pas të jetoni me këtë,” ka thënë ai për New York Times.

Prodhimi i tij më i fundit, “Mami”, një bashkëprodhim ndërkombëtar, është shfaqur me sukses në Festivalin e Avinjonit dhe është vlerësuar për mjeshtërinë vizuale dhe emocionale. Pavarësisht suksesit ndërkombëtar, Banushi ruan lidhjen e fortë me gjuhën dhe kulturën shqiptare, duke mbajtur titujt e shfaqjeve origjinal në shqip.

Mario Banushi është një shembull i talentit të ri shqiptar që po shkon përtej kufijve, duke ndërtuar një identitet teatral unik, të njohur dhe të vlerësuar në skenën ndërkombëtare./Albinfo.ch

---