Granit Musliu ngjitet në skenën e Operës Mbretërore Daneze

Granit Musliu sjell Dukën e Mantovës në Operën Mbretërore të Danimarkës

Tenori kosovar Granit Musliu po shënon një debutim të dyfishtë në Danimarkë: në skenën daneze dhe në rolin e Dukës së Mantovës në operën “Rigoletto” të Giuseppe Verdit, në Operën Mbretërore të Danimarkës. Roli i Dukës – aristokrat karizmatik, joshës, por edhe i pamoralshëm, është një nga më kërkuesit për tenorët dhe kërkon virtuozitet vokal si dhe prani të fuqishme skenike, shkruan Albinfo.ch.

Për Musliun, i njohur tashmë në skenat operistike gjermane, ky debutim përfaqëson një hap të rëndësishëm profesional. Ai do ta sjellë personazhin përmes arieve të njohura si “La donna è mobile”, “Questa o quella” dhe “È il sol dell’anima”, duke i dhënë jetë figurës që nxit tragjedinë e Rigolettos dhe vajzës së tij, Gildës.

“Një përvojë shumë e bukur dhe një moment i veçantë në karrierën time, debutimi im i parë në këtë rol të madh”, ka thënë Musliu, duke theksuar se interpretimi i Dukës në këtë fazë konfirmon pjekurinë e tij në repertorin verdian.

I diplomuar në Prishtinë dhe Hamburg, Granit Musliu është pjesë e ansamblit të Operës Shtetërore të Bavarisë. Ai ka realizuar dhe pritet të realizojë një sërë debutimesh të rëndësishme në skena prestigjioze evropiane, duke u konsoliduar si një nga talentet më premtuese të brezit të ri të tenorëve shqiptarë./Albinfo.ch

https://www.facebook.com/share/p/1AJqeNJMVH/?mibextid=wwXIfr

---