Sopranoja Elbenita Kajtazi debuton në Hamburg dhe Berlin

Elbenita Kajtazi debuton me “La Traviata” në Hamburg

Sopranoja shqiptare me famë ndërkombëtare, Elbenita Kajtazi, ka shënuar një tjetër moment të rëndësishëm në karrierën e saj artistike, duke interpretuar për herë të parë rolin e Violettës në operën La Traviata në Hamburg, transmeton albinfo.ch.

Në të njëjtën ditë, Deutsche Oper Berlin ka publikuar një intervistë me Kajtazin, ku ajo flet për rikthimin e saj në rolin e Violettës, në skenën ku nisi rrugëtimi i saj artistik. Nga Kosova, ku nuk ka ende një shtëpi operistike, deri në një nga skenat më prestigjioze të Evropës, rruga e saj artistike përfaqëson një histori suksesi dhe përkushtimi.

Artistja kujton zhvillimin e saj nga roli i Anninës deri te Violetta, një personazh që, sipas saj, vazhdon të rritet bashkë me zërin dhe përvojën e saj profesionale.

Pas shfaqjes në Hamburg, Elbenita Kajtazi pritet të rikthehet së shpejti sërish në Berlin, duke vazhduar kështu angazhimet e saj në skenat më të njohura operistike evropiane.

---