Ngjarja tragjike në Zvicër, Maqedonia e Veriut në gatishmëri për ndihmë

Maqedonia shpreh gatishmëri për të mbështetur autoritetet zvicerane pas aksidentit

Ministria e Punëve të Jashtme dhe Tregtisë së Jashtme e Maqedonisë së Veriut ka bërë të ditur se pas tragjedisë në një bar në qendrën zvicerane të skijimit Crans-Montana, ku humbën jetën rreth 40 persona dhe mbi 100 të tjerë u lënduan, autoritetet maqedonase janë në gatishmëri për të ofruar ndihmë, transmeton albinfo.ch.

Ministri i Punëve të Jashtme dhe Tregtisë së Jashtme, Timço Mucunski, pas konsultimeve me kryeministrin Hristijan Mickoski dhe ministrin e Shëndetësisë Azir Aliu, zhvilloi një bisedë telefonike me ambasadorin e Zvicrës në vend, Christoph Sommer. Gjatë bisedës, Mucunski shprehu ngushëllime të sinqerta për familjet e viktimave dhe për popullin zviceran, duke uruar shërim të shpejtë dhe të suksesshëm për të lënduarit.

Ndërkohë, ministri i Shëndetësisë, Azir Aliu, bëri të ditur se po shqyrtohen mundësitë për t’i ofruar ndihmë të nevojshme Zvicrës. Ai theksoi se Ministria e Shëndetësisë është në koordinim me Drejtorinë për Mbrojtje dhe Shpëtim të RMV-së, ndërsa përmes Qendrës Koordinuese të BE-së për Reagim ndaj Emergjencave (EU ERCC) është vendosur një kanal komunikimi me autoritetet shëndetësore zvicerane.

“Ngushëllime të sinqerta për familjet e viktimave, ndërsa të lënduarve u dëshirojmë shërim sa më të shpejtë,” deklaroi Aliu, duke nënvizuar gatishmërinë e institucioneve maqedonase për të ofruar mbështetje të përshtatshme.

Po ashtu, Ambasada e Maqedonisë së Veriut ka bërë të ditur se monitoron zhvillimet dhe është në gatishmëri për të ndihmuar qytetarët maqedonas që mund të jenë të prekur nga ngjarja tragjike.

---