Festë e kthyer në tragjedi, shpërthim në një qendër skish në Zvicër, raportohen viktima

Shpërthim fatal gjatë festimeve të Vitit të Ri në Zvicër

Një shpërthim i rëndë ka ndodhur në orët e para të nisjes së vitit 2026 në Zvicër, në një zonë ku po zhvilloheshin festimet e Vitit të Ri. Ngjarja tragjike është shënuar në një bar të vendosur brenda një qendre për ski, transmeton albinfo.ch.

Sipas policisë, disa persona kanë humbur jetën si pasojë e shpërthimit, i cili më pas ka shkaktuar edhe zjarr. Përveç viktimave, raportohet edhe për persona të plagosur, ndërsa autoritetet nuk kanë dhënë ende një numër të saktë të tyre.

Shpërthimi ka ndodhur rreth orës 01:30 në një bar të quajtur “Le Constellation”. Shkaqet e incidentit mbeten ende të panjohura.

Crans-Montana është një qytet luksoz dhe i njohur si resort skish, i vendosur në zemër të Alpeve Zvicerane, rreth dy orë larg kryeqytetit Bernë. Zona frekuentohet nga mijëra turistë, veçanërisht gjatë festave të fundvitit.

Autoritetet zvicerane kanë rrethuar zonën dhe po punojnë për të zbardhur plotësisht rrethanat e ngjarjes. /Albinfo.ch

---