Kina vendos tarifa të reja ndaj produkteve të qumështit nga Europa

Një front i ri është hapur në marrëdhëniet tashmë të tensionuara tregtare mes Kinës dhe Bashkimit Evropian. Pekini do të vendosë tarifa doganore ndaj disa produkteve evropiane të qumështit, një masë e dënuar ashpër nga BE-ja dhe nga prodhuesit evropianë, të cilët e konsiderojnë plotësisht të pajustifikuar.

Këto tarifa “të përkohshme”, që variojnë nga 21.9% deri në 42.7%, do të hyjnë në fuqi të martën, njoftoi të hënën Ministria Kineze e Tregtisë. Ato prekin një gamë të gjerë produktesh, përfshirë djathërat e freskët dhe të përpunuar, djathërat blu, si dhe disa lloje qumështi dhe kremi. Sipas Pekinit, këto produkte përfitojnë nga subvencione që shkaktojnë “dëm të konsiderueshëm” për konkurrencën kineze.

“Kjo është një zhvillim shumë negativ” në marrëdhëniet mes BE-së dhe Kinës, reagoi një zëdhënës i Komisionit Evropian. “Është një tronditje, një goditje e vërtetë”, shtoi François-Xavier Huard, drejtor ekzekutiv i Federatës Kombëtare të Industrisë së Qumështit, e cila përfaqëson industrialistë francezë si Lactalis dhe Danone.

Një masë hakmarrëse

Qeveria kineze e mori këtë vendim në kuadër të një hetimi kundër subvencioneve, të nisur në gusht 2024, zyrtarisht pas një kërkese nga Shoqata Kineze e Qumështit.

Megjithatë, për evropianët kjo përbën një masë hakmarrëse, pasi hetimi u njoftua një ditë pasi BE-ja shpalli vendimin për të vendosur tarifa të larta ndaj automjeteve elektrike të prodhuara në Kinë.

Sipas Komisionit Evropian, Pekini planifikon ta përfundojë hetimin ndaj sektorit evropian të qumështit më 21 shkurt, moment në të cilin tarifat mund të bëhen përfundimtare.

Përpjekje për të bindur Pekinin

Brukseli po përpiqet ta bindë Kinën të heqë dorë nga kjo masë. “Analiza jonë tregon se ky hetim bazohet në pretendime të dyshimta dhe prova të pamjaftueshme, prandaj masat janë të pajustifikuara dhe të pabazuara”, deklaroi Olof Gill, zëdhënës i Komisionit Evropian.

“Po bëjmë gjithçka të nevojshme për të mbrojtur fermerët dhe eksportuesit e BE-së, si dhe Politikën e Përbashkët Bujqësore, nga keqpërdorimi i masave mbrojtëse tregtare nga Kina”, shtoi ai, duke kujtuar se Komisioni e ka referuar çështjen edhe në Organizatën Botërore të Tregtisë.

Tensione të shumta tregtare

Javën e kaluar, Kina njoftoi gjithashtu vendosjen për pesë vjet të taksave “anti-dumping”, nga 4.9% deri në 19.8%, mbi mishin e derrit dhe nënproduktet e tij të importuara nga BE-ja, bazuar në një tjetër hetim të hapur në korrik 2024. Kjo masë u prit me njëfarë lehtësimi nga prodhuesit evropianë të derrit, të cilët përballeshin me tarifa të përkohshme edhe më të larta, që mund të arrinin deri në 62.4%.

Elemente të rralla dhe çipa elektronikë

Marrëdhëniet tregtare mes BE-së dhe Kinës janë tensionuar që nga viti 2024. Përveç konkurrencës së pandershme në tregun automobilistik, të denoncuar nga evropianët, BE-ja akuzon Pekinin për ruajtjen e kapaciteteve të mëdha të tepërta në prodhimin e çelikut përmes subvencioneve, duke rrezikuar industrinë evropiane.

Për këtë arsye, Komisioni Evropian propozoi këtë vjeshtë masa mbrojtëse të paprecedenta për të shpëtuar industrinë e çelikut në Evropë.

Kufizimet e eksporteve kineze të elementeve të rralla, lëndë të para thelbësore për shumë sektorë të ekonomisë evropiane, kanë shkaktuar gjithashtu tensione të forta, të përforcuara më tej nga mosmarrëveshja mes Pekinit dhe Hagës lidhur me prodhuesin e komponentëve elektronikë Nexperia.

---