Trumpi me paralajmërim për kompanitë ajrore: Qëndroni larg Venezuelës

(AP Photo/Luis M. Alvarez)

Presidenti amerikan Donald Trump përmes një postimi në rrjetet sociale u ka kërkuar të gjitha linjave ajrore, pilotëve dhe grupeve kriminale që të konsiderojnë hapësirën ajrore mbi dhe rreth Venezuelës si të mbyllur plotësisht, teksa tensionet me Caracasin po rriten.

Duke pasur parasysh se SHBA-ja nuk ka autoritet të mbyllë hapësirën ajrore të një shteti tjetër, deklarata e Trumpit pritet të ndikojë në vendimet e kompanive ajrore dhe të krijojë pasiguri në fluturimet drejt e nga Venezuela, transmeton albinfo.ch.

“Për të gjitha linjat ajrore, pilotët, trafikantët e drogës dhe trafikantët e qenieve njerëzore, ju lutem konsideroni SE HAPËSIRA AJRORE MBI DHE PËRRETH VENEZUELËS ËSHTË PLOTËSISHT E MBYLLUR. Faleminderit për vëmendjen ndaj kësaj çështjeje!”, ka shkruar ai në “Truth Social”.

Mediat në SHBA kanë konsideruar se ky postim mund të jetë ose një presion psikologjik ndaj regjimit të Nicolas Maduros, ose një paralajmërim i vërtetë për ndërhyrje ushtarake.