Një skandal i madh korruptiv ka vënë presidentin ukrainas Zelensky në vështirësi

EPA/SERGEY DOLZHENKO

Dy ministra ukrainas dhanë dorëheqjen pas kërkesës së Zelensky për shkak të një skandali korruptiv. Në qendër të skandalit ndodhet një bashkëpunëtor i afërt i presidentit ukrainas.

Ministri i Drejtësisë, Herman Halushchenko, dhe Ministrja e Energjisë, Svitlana Grinchuk, të dyve iu kërkua të dorëhiqeshin. Të dy morën detyrën vetëm në muajin korrik. Dorëheqjet lidhen me një skandal në agjencinë ukrainase të energjisë bërthamore, Energoatom.

Ministrja e Energjisë, Svitlana Grinchuk, dha dorëheqjen përmes shërbimeve online, duke deklaruar se nuk kishte shkelur asnjë ligj.

Pak më vonë, Ministri i Drejtësisë, Herman Halushchenko, njoftoi gjithashtu dorëheqjen e tij, pas pezullimit të tij nga detyra të martën, pas kontrolleve në shtëpinë e tij, transmeton albinfo.ch.

Të dy ministrat ishin në detyrë vetëm që nga korriku si pjesë e një reshuffle qeveritar në Kijev. Presidenti Zelensky u kishte kërkuar më parë të dyve të japin dorëheqjen për shkak të akuzave, duke u bërë thirrje deputetëve të mbështesin kërkesat e tij.

Hetimi përqendrohet tek ryshfetet që dyshohet se u dhanë lidhur me ndërtimin e strukturave mbrojtëse për objektet e Energoatom, për të parandaluar sulmet ajrore ruse. Një hetim i Byrosë Anti-Korrupsion raportoi pesë arrestime dhe shtatë raste të dyshuara. Sipas hetimeve, grupi dyshohet të ketë larë rreth 100 milionë dollarë në ryshfete. Hetuesit publikuan edhe një foto me një grumbull dollarësh të palarë.

Dyshohet se ryshfetet ishin midis 10 dhe 15 për qind të kostove të kontratave me kontraktorët privatë të Energoatom. Një regjistrim i NABU (Byroja e Anti-Korrupsionit) tregon kërcënime për ndërprerjen e këtyre kontratave nga ish-këshilltari i ministres së energjisë, Ihor Myronyuk.

Në qendër të hetimit ndodhet Timur Mindich, bashkëpunëtori i gjatë i Zelensky. Ai dyshohet se ka ushtruar ndikim jo vetëm mbi Halushchenko, por edhe mbi ish-Ministrin e Mbrojtjes, Rustem Umyerov, sipas mediave që citojnë prokurorin Serhiy Savitsky. Umyerov e pranoi se kishte pasur kontakt me Mindich, por e mohoi kategorikisht çdo akuzë për korrupsion.

Sipas mediave ukrainase, Mindich dyshohet se është përfshirë në biznese të paligjshme dhe ka përfituar nga industria e armëve, sektor ky i rëndësishëm për Ukrainën. Ai thuhet se është larguar jashtë vendit pas një paralajmërimi për kontrolle në shtëpi dhe raportohet se aktualisht ndodhet në Izrael.

Mindich dhe një partner biznesi dyshohet se kanë marrë 10-15% të kostove të kontratave të Energoatom dhe i kanë larë paratë përmes një rrjeti kompanish, përfshirë transferta edhe drejt Rusisë.

Ky duket të jetë skandali më i madh i ryshfeteve në Ukrainë gjatë luftës prej më shumë se tre vjet e gjysmë kundër Rusisë. Pavarësisht reformave, vendi, që aspiron anëtarësimin në BE, mbetet një nga më të ndikuarit nga korrupsioni në Europë.