Dielli Vranoci, kampion i dyfishtë në Austri

Dielli Vranoci: Çdo fitore ia dedikoj prindërve që nuk janë më

Boksieri shqiptar me origjinë nga Peja, Dielli Vranoci, ka shënuar një tjetër sukses të madh në karrierën e tij profesionale, transmeton albinfo.at.

Në ndeshjen e zhvilluar në Korneuburg të Austrisë, ai triumfoi ndaj rivalit Ahmet Simsek, duke siguruar fitoren e tij të 13-të në boksin profesionist.

Përkundër përvojës dhe formës së mirë të Simsek, që deri më tani kishte nëntë fitore pa humbje, Vranoci u shpall fitues me pikë më të larta, duke e vulosur kështu titullin kampion i dyfishtë i Austrisë.

Në një intervistë për ABC e Mëngjesit, boksieri ndau emocionet pas fitores dhe foli për rrugëtimin e tij në sportin e boksit.

“Jam pjesë e boksit profesionist prej pesë vitesh dhe në total kam zhvilluar 16 ndeshje. Me boksin merrem prej 15 vitesh dhe kam marrë pjesë në shumë gara ndërkombëtare – ndër to, arritja më e madhe ka qenë pjesëmarrja në Lojërat Mesdhetare,” – tregoi Vranoci.

Ndeshja e fundit, e zhvilluar në 10 raunde, kishte rëndësinë e veçantë të titullit kombëtar të Austrisë. Pas këtij triumfi, boksieri shqiptar pritet të marrë një pauzë deri në fillim të vitit të ardhshëm, kur planifikon të rikthehet me sfida të reja.

“Për momentin po fokusohem te stërvitjet dhe palestra që kam hapur së fundmi. Dua të punoj me të rinjtë, të zbuloj talente të reja që mund të ndjekin këtë rrugë,” – tha ai.

Me një karrierë në rritje dhe qëndrueshmëri të jashtëzakonshme në ring, Dielli Vranoci mbetet një nga emrat më premtues të boksit shqiptar në diasporë. Ai e mbylli intervistën me një dedikim prekës:

“Çdo fitore, çdo sukses e ia dedikoj prindërve të mi që sot nuk jetojnë. Ata janë forca ime më e madhe.”/Albinfo.ch

---