Vonesa dhe infiltrime mafioze 100 ditë para fillimit të lojërave olimpike dimërore në Itali

Vetëm 100 ditë para nisjes së Lojërave Olimpike Dimërore që do të mbahen në Milano dhe Cortina d’Ampezzo, Italia po përballet me probleme serioze në përgatitje. Përveç vonesave në disa kantiere ndërtimi, autoritetet kanë zbuluar edhe përpjekje për infiltrime mafioze në tenderët publikë të lidhur me projektet olimpike.

Sipas Drejtorisë Antimafia italiane, janë regjistruar mbi 50 raste të mundshme “ndotjeje” të procedurave publike, ndërsa kompani të lidhura me mafian kalabreze ‘Ndrangheta janë përjashtuar. Shoqata Libera ka kërkuar që Lojërat të shërbejnë si shembull i ndershmërisë dhe i respektimit të ligjit.

Ndërkohë, disa nga projektet infrastrukturore – përfshirë rrugën strategjike Longarone–Cortina – rrezikojnë të mos përfundojnë në kohë. Sipas raportimeve të “Affari Italiani”, 24 kantiere të financuara nga fondet olimpike mund të përfundojnë vetëm pas vitit 2027.

Kostoja e përgjithshme e përgatitjeve është rritur ndjeshëm, nga 1.36 miliardë në gati 6 miliardë euro. Një pjesë e fondeve shtesë, rreth 43 milionë euro, janë marrë nga fondi i kompensimit për viktimat e mafias – çka ka ngjallur kritika nga organizatat kundër krimit të organizuar.