Vlashent Sata, live në Bernë

Një udhëtim muzikor mes rrënjëve shqiptare dhe frymës franceze. Vlashent Sata është këngëtar, kantautor, kompozitor dhe pianist franko-shqiptar

Më 25 tetor 2025 Konsi Bern (Kramgasse 36, 3011 Bern), do të tingëllojë një zë që tejkalon kufijtë e gjuhës dhe kulturës – Vlashent Sata, këngëtari, kompozitori dhe pianisti franko-shqiptar që ka bërë bashkë elegancën franceze dhe shpirtin shqiptar në një gjuhë universale: muzikën.

🕖 Ora: 19:30
📍 Vendi: Konsi Bern
🎟️ Biletat: www.jadeevent.ch/events/vlashent-sata

Për artistin:

Vlashent Sata (i lindur më 1983 në Tiranë) është këngëtar, kantautor, kompozitor dhe pianist franko-shqiptar, i njohur për stilin e tij poetik dhe të sofistikuar.

I rritur në një familje muzikantësh, ai nisi të performojë që në moshën pesëvjeçare, duke ndjekur pasionin për muzikën nën frymëzimin e të atit, muzikologut të njohur Loro Sata. Në adoleshencë, ai nisi të kompozonte dhe zhvilloi në mënyrë autodidakte aftësitë e tij në kitarë.

Në vitin 2002, Sata u zhvendos në Francë, ku vazhdoi studimet e avancuara për piano në Bordeaux dhe Paris, nën udhëheqjen e Denis Pascal dhe Romano Pallottini.
Pas diplomimit në pedagogji muzikore (2011), ai nisi karrierën akademike si pedagog në konservatorët “Paul Dukas” dhe “Gabriel Fauré” në Paris, ku vazhdon të ligjërojë edhe sot.

Albumi i tij debutues, “Hana” (2016), u prit me vlerësime të larta nga kritika dhe u transmetua në radio ndërkombëtare, nga Montreali deri në Dakar.
Përveç krijimtarisë së tij muzikore, ai është themelues dhe drejtor artistik i “Zâ Fest”, festivalit më të njohur shumëdisiplinor në Shqipëri, që ka sjellë një frymë të re në peizazhin artistik shqiptar, duke bashkuar muzikën, poezinë dhe artet vizuale në një formë të pastër e autentike.

Ky koncert është pjesë e një kalendari të pasur eventesh që synojnë promovimin e artit shqiptar në Zvicër dhe forcimin e urave kulturore mes artistëve dhe komunitetit të diasporës.

 

---