Danimarka ndalon fluturimet e dronëve para samitit të BE-së

Përpara samitit të Bashkimit Evropian që do të mbahet këtë javë, Danimarka ka vendosur të mbyllë hapësirën e saj ajrore për dronët civilë, njoftuan zyrtarët sot, pas disa incidenteve të shfaqjeve të dronëve në afërsi të aeroporteve gjatë natës.

Forcat e armatosura daneze raportuan prezencën e disa dronëve pranë bazave ushtarake, duke rritur shqetësimet për sigurinë.

Ministria e Transportit njoftoi se nga sot deri të premten ndalohet çdo fluturim civil me dronë në të gjithë territorin e Danimarkës, ndërkohë që në Kopenhagen priten takime të rëndësishme të liderëve të BE-së.

Ministri Thomas Danielsen theksoi se kjo masë merret për të garantuar sigurinë dhe për të parandaluar çdo rrezik apo shqetësim gjatë pritjes së liderëve evropianë.

Takimi i BE-së në Kopenhagen do të fokusohet në çështje të mbrojtjes së infrastrukturës kritike dhe përgatitjes së mëtejshme për situata emergjente në nivel evropian.

Danimarka, e cila ka marrë kryesimin e Këshillit të BE-së këtë verë, është në gatishmëri të shtuar pas disa incidenteve të fundit me dronë. Aeroporti kryesor u detyrua të mbyllej për disa orë, ndërsa aeroporte më të vogla u prekën në ditët pasuese. Një dron u pa gjithashtu mbi bazën më të madhe ushtarake në vend.

Qeveria e ka cilësuar këtë si një “sulm hibrid” dhe po heton mundësinë e një aktori profesional që synon të krijojë tensione në një anëtar të NATO-s.

Rusia ka mohuar përfshirjen në këto ngjarje përmes deklaratës së ambasadës së saj në Danimarkë.