SAN: “Hapi tjetër fillon me ty!”

“Mos prisni momentin perfekt – përfshihuni tani. SAN jeton nga ata që japin, që angazhohen dhe që janë të gatshëm të lëvizin gjërat së bashku”

Swiss Albanian Network (SAN) u themelua në fund të vitit 2019 – si reagim ndaj një postimi të thjeshtë në LinkedIn nga një profesionist shqiptar. Pyetja ishte: “A ka ndonjë vend në Basel ku takohen shqiptarët?” Reagimet ishin të shumta, por pa përgjigje konkrete. Florent Hasani vendosi të veprojë, kontaktoi të gjithë ata që kishin pëlqyer postimin  dhe në fund të nëntorit organizoi takimin e parë komunitar me mbi 30 pjesëmarrës. Lëvizja kishte nisur  nga komuniteti, për komunitetin. Kjo është, ma pak fjalë, “historia” e rrjetit SAN, për të cilën flet kryetari i saj, Florent Hasani

Albinfo.ch: Cili është misioni dhe vizioni i rrjetit tuaj?
F. Hasani: Misioni ynë është të krijojmë një platformë ku shqiptarët në Zvicër mund të lidhen, të mbështesin njëri-tjetrin dhe të zhvillohen së bashku – profesionalisht dhe njerëzisht. Vizioni ynë: një komunitet shqiptar krenar, i dukshëm dhe i lidhur, që fuqizon veten dhe merr pjesë aktive në jetën shoqërore në Zvicër. Nuk bëhet fjalë vetëm për rrjetëzim, por edhe për përfitime konkrete për anëtarët tanë: Falë partneriteteve të zgjedhura  p.sh. me albinfo.ch (dukshmëri mediatike), Visana (kushte të veçanta për sigurime) dhe partneri ynë i ri Yallo (në përgatitje) , ne ofrojmë përfitime reale për komunitetin tonë dhe përforcojmë qarkullimin ekonomik brenda diasporës.

Albinfo.ch: Në cilat fusha jeni më aktivë?
F. Hasani: Swiss Albanian Network është veçanërisht aktiv atje ku njerëzit takohen, mësojnë nga njëri-tjetri dhe rriten së bashku. Fokusi ynë është në rrjetëzim profesional, fuqizimin e profesionistëve shqiptarë dhe promovimin e sipërmarrjes brenda diasporës. Një rëndësi të veçantë i kushtojmë shkëmbimit ndërbreznor: lidhim persona me përvojë me talente të reja dhe krijojmë hapësira për inspirim dhe bashkëpunim konkret. Gjithashtu, jemi aktivë në fusha si edukimi, mentorimi dhe identiteti kulturor,  përmes eventeve, përmbajtjeve digjitale dhe partneriteteve strategjike. Në këtë kontekst, jemi veçanërisht mirënjohës për bashkëpunimin e ngushtë me albinfo.ch, i cili ka qenë me ne që nga fillimi dhe ka ndihmuar në rritjen dhe dukshmërinë e platformës.

Albinfo.ch: Cilat janë aktivitetet ose iniciativat më të rëndësishme që keni organizuar deri më tani?
F. Hasani: Disa nga kulmet tona deri më tani janë takimet e rregullta komunitare, eventet e rrjetëzimit dhe formati “After Work Drinks”, i cili nxit shkëmbimin profesional mes brezave dhe sektorëve të ndryshëm. Po ashtu, “Women Only Events”,  të organizuara nga Saranda Dervisholli – që synojnë fuqizimin dhe dukshmërinë e grave shqiptare në diasporë. Një format tjetër i veçantë është “Albanian Day Party” – një event kulturor i gjallë, i cili lindi falë iniciativës së Dafina Isufi, pronare e Mini Café Bar, dhe që zhvillohet në bashkëpunim të ngushtë me të. Krenohemi gjithashtu për bashkëpunimet tona me shoqata të ndryshme shqiptare në Zvicër si dhe për partneritetin tonë strategjik me albinfo.ch, i cili përçon mesazhin, vlerat dhe sukseset tona në publikun më të gjerë.

Albinfo.ch: Sa anëtarë aktivë ka rrjeti dhe çfarë profile përfaqësojnë ata?
F. Hasani: Aktualisht, SAN numëron mbi 450 anëtarë aktivë. Ata vijnë nga fusha të ndryshme: studentë, profesionistë, sipërmarrës, persona nga sektori i IT-së, drejtësisë, edukimit, shëndetësisë, komunikimit dhe më shumë. Ajo që i bashkon është dëshira për të rritur së bashku dhe për të përfaqësuar me dinjitet komunitetin shqiptar në Zvicër.

Albinfo.ch: Si e mundësoni përfshirjen e profesionistëve të rinj shqiptarë në aktivitetet e SAN?

F. Hasani: Përmes LinkedIn, Instagram dhe rekomandimeve personale ftojmë aktivisht të rinjtë që t’i bashkohen rrjetit. Eventet tona janë të hapura dhe gjithëpërfshirëse. Çdo person i ri pritet si pjesë e lëvizjes – jo si vizitor.

Albinfo.ch: Cilat janë sfidat më të mëdha me të cilat përballeni në misionin tuaj?

F. Hasani: Disa nga sfidat më të mëdha janë sigurimi i resurseve për organizim profesional, balancimi mes punës vullnetare dhe standardeve profesionale, përfshirja e të gjitha rajoneve gjuhësore të Zvicrës dhe tejkalimi i paragjykimeve ndaj organizimeve komunitare.

Albinfo.ch: Cilat janë disa nga arritjet që ju bëjnë më krenarë si rrjet?

F. Hasani: Ndër sukseset tona më të mëdha janë uniteti i krijuar në komunitet, partneritetet e fuqishme me organizata si albinfo.ch, Visana, Migrol apo Binelli Automobile AG, dhe fuqizimi real i të rinjve shqiptarë në Zvicër.

Një moment i veçantë ishte çmimi “Professional Excellence Award” më 15 qershor 2025 në Londër – një përjetim i thellë emocional dhe profesional për Florent Hasani, i cili u shoqërua në këtë rrugëtim nga: Viosa Zeneli, Lorenta Ibishi, Marigona Marku, Arbnore Marku, Lidije Sinani, Flamur Jashari, Asmir Imeri dhe Patrik Sopi.

Edhe pse nuk ishin fizikisht prezentë, një falënderim i veçantë shkon për Latife Namani (Marketing) dhe Taulant Haxhisefa (Dizajn), të cilët e mbështetën ekipin nga Zvicra me përkushtim dhe profesionalizëm.  Më shumë për udhëtimin dhe ndarjen e çmimit mund të gjeni në Instagram dhe LinkedIn.

Albinfo.ch: A bashkëpunoni me organizata të tjera shqiptare në Zvicër apo me institucione ndërkombëtare?

F. Hasani: Po, bashkëpunojmë me shoqata të ndryshme shqiptare në Zvicër dhe me aktorë ndërkombëtarë. Veçanërisht për t’u përmendur janë albinfo.ch dhe Strategic Opportunity Investment AG (S.O.I.), si dhe zurichnetgroup ag, të cilët mundësuan pjesëmarrjen tonë në ceremoninë e ndarjes së çmimeve në Londër. Këto partneritete dëshmojnë rëndësinë e bashkëpunimit të besueshëm – brenda komunitetit dhe me sektorin ekonomik zviceran.

Albinfo.ch: Çfarë mesazhi dëshironi të përcillni për profesionistët dhe ndërmarrësit shqiptarë që duan të angazhohen në rrjetin tuaj?
F. Hasani: Mos prisni momentin perfekt – përfshihuni tani. SAN jeton nga ata që japin, që angazhohen dhe që janë të gatshëm të lëvizin gjërat së bashku. Komuniteti ynë është aq i fortë sa angazhimi ynë kolektiv. Hapi tjetër fillon me ty.

📲 Skano tani QR-kodin dhe bëhu pjesë e një rrjeti që nuk ofron vetëm përfitime, por krijon mundësi, lidhje dhe ndikim real për komunitetin shqiptar në Zvicër.

 

 

---