Kopenhagen: Aeroporti mbyllet nga dronët, 20 fluturime vonohen

Aeroporti i Kopenhagenit mbyllet pasi u panë disa dronë të paidentifikuar

Aeroporti i Kopenhagenit u mbyll të hënën në mbrëmje për shkak të pranisë së dronëve në hapësirën ajrore, përcjell albinfo.ch.

Radari në aeroportin e Kastrupit zbuloi dy dronë të mëdhenj dhe 11 fluturime janë devijuar tashmë në aeroportet pranë kryeqytetit danez, raportoi Reuters.

Videoja tregon një dron që fluturon mbi aeroportin e Kopenhagenit.

Sipas faqes së specializuar të internetit Flightradar, e cila monitoron transportin ajror, të gjitha ngritjet dhe uljet janë pezulluar që nga ora 20:26, sipas orës lokale.

Sipas mediave lokale, prania e policisë në zonën e aeroportit është veçanërisht e fortë.

Deklarata e policisë përmend 2-3 dronë të mëdhenj.

Pak kohë më vonë, rreth orës 9 të mbrëmjes (ora lokale), u raportua se dronë ishin shfaqur pranë një zone ushtarake në Oslo, Norvegji. Dronët u vunë re nga personeli i njësisë dhe dy persona nga Singapori u arrestuan pak kohë më vonë.

Të paktën 20 fluturime për në dhe nga kryeqyteti danez u anuluan ose u vonuan të hënën në mbrëmje, sipas informacionit të fluturimit të publikuar në faqen zyrtare të Aeroportit të Kopenhagenit.

Dhjetëra fluturime me destinacion Kopenhagenin u devijuan në aeroporte më të vogla në Danimarkë, ndërsa të tjera u drejtuan për në Göteborg dhe Malmo në Suedi, tha aeroporti.

Policia në kryeqytetin norvegjez, Oslo, tha të hënën se kishte arrestuar dy të huaj për fluturim dronësh mbi një zonë të kufizuar, por nuk kishte asnjë indikacion se incidenti ishte i lidhur me ngjarjet në Kopenhagen.

---