Robotaksitë po vijnë në Evropë: Lyft dhe Baidu nisin bashkëpunimin

Kompania amerikane Lyft ka arritur një marrëveshje me gjigantin kinez Baidu për të sjellë në Evropë shërbimin e taksive autonome pa shofer. Nisja do të bëhet vitin e ardhshëm në Gjermani dhe Mbretërinë e Bashkuar, ku përdoruesit do të mund të rezervojnë udhëtime me modelin elektrik RT6 të Baidu-s përmes aplikacionit Lyft, në varësi të miratimit nga autoritetet përkatëse.

Flota pritet të zgjerohet në mijëra automjete në mbarë kontinentin, falë blerjes nga Lyft të platformës evropiane FreeNow, me një marrëveshje prej 200 milionë dollarësh. Ky hap i jep Lyft qasje në tregje të nëntë vendeve dhe mbi 180 qytete, duke shënuar hyrjen e saj të parë jashtë Amerikës së Veriut. Lyft do të menaxhojë shërbimin, përfshirë kujdesin ndaj klientëve dhe logjistikën e flotës, ndërsa Baidu do të ofrojë teknologjinë dhe vetë automjetet.

Konkurrenca nuk fle

Ndërkohë, Uber ka paralajmëruar planet e veta për të futur robotaksi në bashkëpunim me kompani si Waymo, Pony.ai, WiRide dhe Moment. Ky shërbim pritet të arrijë në Evropë deri në vitin 2026. Aktualisht, shërbimi Apollo Go i Baidu-s operon në 15 qytete me mbi një mijë automjete dhe më shumë se 11 milionë udhëtime të realizuara.

Sa i përket taksisë robotike “Vern” të Rimac, ende nuk ka një datë të saktë lançimi. Sipas deklaratave të vitit të kaluar nga drejtori ekzekutiv Marko Pejkovic, kontrata ishin firmosur me 11 qytete në Mbretërinë e Bashkuar, BE dhe Lindjen e Mesme.