Rita Ora rikthehet me këngë të re për serialin “Love Is Blind UK” në Netflix

Këngëtarja me origjinë shqiptare, Rita Ora, ka përgatitur një projekt muzikor të ri që do të shoqërojë serialin popullor të takimeve “Love Is Blind UK” në platformën Netflix. Kënga mban titullin “Joy” dhe është një baladë emocionale që trajton temën e gjetjes së paqes së brendshme, përcjell albinfo.ch.

Sipas burimeve nga mediat britanike, “Joy” nuk do të jetë pjesë e albumit të saj të katërt në studio, por vjen si një projekt i veçantë i krijuar enkas për serialin. Kënga pritet të publikohet së shpejti dhe do të jetë e disponueshme për dëgjim në platformat streaming. Megjithatë, nuk ka në plan një videoklip zyrtar apo një fushatë të gjerë promovuese.

Në një intervistë të fundit, Rita ka ndarë reflektime personale mbi rrugëtimin e saj artistik, duke përmendur vështirësitë që ka hasur gjatë karrierës. Ajo ka falënderuar edhe Beyoncé-n për mbështetjen e dhënë në momentet kur përballej me spekulime dhe akuza të padrejta për jetën e saj private.

Rita gjithashtu foli hapur për sfidat me vetëbesimin dhe marrëdhënien me trupin e saj, duke theksuar se sot ndihet më e fuqishme dhe e përmbushur si artiste dhe si grua.

Publikimi i “Joy” shënon një tjetër hap përpara në karrierën e saj ndërkombëtare dhe përforcon pozitën e Ritës si një prej figurave më të spikatura të muzikës pop në skenën globale.