Aeroplani i Deltas përfshihet nga flakët gjatë ngritjes

Një aeroplan i kompanisë ajrore Delta Air Lines është detyruar të kthehet urgjentisht në Aeroportin Ndërkombëtar të Los Angelesit (LAX), pasi njëri prej motorëve të tij u përfshi nga flakët gjatë ngritjes, transmeton albinfo.ch.

Bëhet fjalë për një Boeing 767-400 që ishte nisur për në Atlanta, por pak minuta pas ngritjes, një zjarr shpërtheu në motorin e majtë të aeroplanit. Pamjet e publikuara nga dëshmitarët tregojnë momentin dramatik kur flakët përfshijnë motorin gjatë fluturimit fillestar.

“Fluturimi i Deltas është kthyer në Los Angeles pak pas ngritjes pas një problemi në motorin e majtë të aeroplanit,” tha një zëdhënës i kompanisë për BBC-në.

Aeroplani ka bërë një ulje të sigurt dhe nuk raportohet për të lënduar mes pasagjerëve apo ekuipazhit, transmeton albinfo.ch.