Numri më i ri i albinfo.ch sjell ofertën turistike të Kosovës, për diasporën

Është vera, koha e pushimeve, dhe shumica prej jush tashmë keni shkuar ose po shkoni në pushimet e merituara. Kur përmendim pushimet, ne nga diaspora nënkuptojmë vizitën në vendlindje, te familjarët në radhë të parë dhe pastaj bregdetin, kryesisht atë shqiptar. Është thënë shumë herë dhe në shumë forma se kjo lidhje e mërgatës me atdheun, që vazhdon të jetë kaq e fuqishme, është një nga faktorët kryesorë të mbijetesës ekonomike të Kosovës, Shqipërisë dhe trojeve të tjera ku jetojnë shqiptarët në Ballkan.

Pikërisht kësaj lidhjeje dhe kësaj atmosfere, magazina Albinfo.ch i ka kushtuar numrin e saj special, veror, të cilin e keni në duar duke filluar nga sot.

Në këtë numër jemi përpjekur të sjellim për ju ofertat kulturore dhe turistike të disa prej qendrave kryesore të Kosovës. Një pjesë e mirë e këtyre ofertave është dizajnuar pikërisht për mërgatën dhe nevojat e interesat e saj. Prandaj ja vlen t’i shfletoni, do t’ju hyjnë në punë kur të vizitoni Prishtinën, Prizrenin dhe qendra të tjera të Kosovës gjatë këtyre pushimeve.

Por nuk është vetëm përshkrimi i kënaqësisë së pushimeve ai të cilit i kemi lënë hapësirë në këtë numër. Janë edhe tema të tjera problemore që lidhen me kohën e pushimeve, të cilat bashkëpunëtorët tanë i kanë trajtuar për t’ju informuar më me hollësi rreth asaj që ju pret gjatë vizitës suaj në Kosovë. Këtu hyn, veç të tjerash, edhe tema mbi kartonin e gjelbër ose sigurimin e automjeteve, me interes për ju që, nga Zvicra, Gjermania e të tjera, vini në Kosovë me makinat tuaja.

Përveç temës bosht, pushimeve, edhe në këtë numër të revistës ju presin tema të larmishme, prezantime emrash të suksesshëm nga kultura, biznesi dhe sportet, në mërgatë. Po kështu pjesë e përhershme e revistës janë edhe rubrikat standarde si prezantimi i librave dhe filmave më aktualë, fjalëkryqi, kuriozitetet, horoskopi etj.

Për fund: Ne ju urojmë pushime të këndshme në atdhe. Sigurisht, duke shfletuar revistën Albinfo.ch e cila ju ndihmon për të shijuar dhe eksploruar në mënyrë më kreative bukuritë që ju presin atje.