Deshifrohet gjenomi i virusit të gripit spanjoll në Zvicër 

Shkencëtarët nga universitetet e Bazelit dhe Cyrihut kanë deshifruar për herë të parë gjenomin e virusit të gripit spanjoll (1918-1920) në Zvicër, duke përdorur një mostër historike. Sipas studimit, virusi kishte shfaqur përshtatje kyçe tek njerëzit që në fillim të pandemisë më vdekjeprurëse të shekullit të kaluar.

Çfarë ishte gripi spanjoll?

Pandemia e gripit spanjoll (1918-1920) shkaktoi nga 20 deri në 100 milionë viktima në mbarë botën dhe konsiderohet një nga katastrofat më të mëdha shëndetësore në histori. Deri tani, shkenca kishte njohuri të kufizuara për mënyrën se si ky virus evoluoi gjatë pandemisë.

Studimi më i fundit

Një ekip ndërkombëtar i udhëhequr nga paleogjenetistja Verena Schünemann nga Universiteti i Bazelit ka rindërtuar për herë të parë gjenomin viral të gripit spanjoll në Zvicër. Mostra, mbi 100 vjeçare, vinte nga një preparat anatomik i ruajtur me formalinë në koleksionin mjekësor të Universitetit të Cyrihut. Pacienti ishte një 18-vjeçar që kishte vdekur në Cyrih në korrik 1918, në fillim të valës së parë të pandemisë në vend.

Tre përshtatje kyçe të virusit

Dy mutacione e bënin virusin më rezistent ndaj një përbërësi antiviral të sistemit imunitar të njeriut, i cili zakonisht vepron si barrierë ndaj sëmundjeve zoonotike, si gripi i shpendëve. Mutacioni i tretë përfshinte një proteinë të membranës virale që, falë ndryshimit gjenetik, lidhej më mirë me receptorët në qelizat njerëzore, transmeton albinfo.ch.

Sipas studimit të publikuar në BMC Biology, këto ndryshime e bënë virusin njëkohësisht më rezistent dhe më infektues.

Metoda e re për viruse të vjetra

Duke qenë se viruset RNA shpërbëhen shpejt, studiuesit zhvilluan një metodë të re për sekuencimin e fragmenteve historike të RNA-së. Kjo teknikë do të mundësojë rikonstruksionin e genomeve të tjera virale të lashta dhe do të ndihmojë në kuptimin më të mirë të pandemive.

Pse ka rëndësi ky zbulim?

“Vetëm nëse kuptojmë dinamikat e përshtatjes së viruseve tek njerëzit përgjatë pandemive, mund të krijojmë modele më të sakta për pandemitë e ardhshme,” thekson Verena Schünemann.

Koleksionet mjekësore, një pasuri e paçmuar

Studimi u krye në bashkëpunim me koleksionin mjekësor të Universitetit të Cyrihut dhe Muzeun Charité për Historinë e Mjekësisë në Berlin.

“Këto koleksione janë arkiva të paçmuara për rindërtimin e genomeve të viruseve të vjetër RNA, potenciali i të cilave nuk është shfrytëzuar ende sa duhet,” thotë Frank Rühli, bashkautor i studimit dhe drejtor i Institutit të Mjekësisë Evolucionare.

 

---