Tragjedi në Teksas: 27 vajza të zhdukura pas përmbytjeve shkatërruese, mbi 50 të vdekur

(AP Photo/Petr David Josek)

Një fatkeqësi natyrore me përmasa tragjike ka goditur shtetin amerikan të Teksasit, ku përmbytjet e fuqishme kanë shkaktuar mbi 50 viktima dhe zhdukjen e dhjetëra personave. Ndër më të goditurit është një kamp veror buzë lumit Guadalupe, ku 27 vajza rezultojnë ende të zhdukura që nga e diela, shkruan DW, transmeton albinfo.ch.

Kampi Mystic në Qarkun Kerr, ku ndodheshin rreth 750 vajza, u përfshi nga ujërat rrëmbyes që u ngritën me 26 metra në vetëm 45 minuta. Ndërtesat u shkatërruan dhe rrugët për në kamp u bënë të pakalueshme, duke penguar operacionet e shpëtimit.

Sherifi i Qarkut Kerr, Larry Leitha, njoftoi se janë konfirmuar 43 viktima vetëm në këtë rajon, përfshirë 28 të rritur dhe 15 fëmijë. Sipas tij, 17 trupat nuk janë ende identifikuar. Media amerikane raportoi se katër nga vajzat e zhdukura në kamp janë gjetur të vdekura.

Ndër viktimat është edhe pronari dhe drejtori i kampit, Dick Eastland, si dhe drejtori i një kampi fqinj. Rreth 850 persona janë shpëtuar në 36 orët e fundit, ndërsa shumë të tjerë mbeten të zhdukur, veçanërisht vizitorë që kishin ardhur për të festuar Ditën e Pavarësisë së SHBA-së.

Autoritetet federale dhe shtetërore kanë shpallur gjendje emergjente. Guvernatori i Teksasit, Greg Abbott, ka kërkuar ndihmë shtesë nga presidenti Donald Trump. Ky i fundit ka reaguar përmes rrjetit social Truth Social, duke thënë se ai dhe bashkëshortja e tij Melania “po luten për familjet e prekura”, transmeton albinfo.ch.

Shërbimi Kombëtar i Motit raportoi se rajoni mori mbi 30 cm shi brenda pak orësh, gjysma e sasisë vjetore mesatare. Sekretarja e Sigurisë Kombëtare, Kristi Noem, pranoi se paralajmërimet ekzistuese nuk e parashikuan intensitetin e kësaj përmbytjeje të rrallë, e cila u quajt një “katastrofë njëherë në një shekull”.

Kritika janë ngritur ndaj autoriteteve lokale që nuk investuan në një sistem paralajmërimi për përmbytjet e shpejta të lumenjve për shkak të kostos së lartë.

Ndërkohë, ekipet e kërkim-shpëtimit ajrore, tokësore dhe ujore po vijojnë punën intensive për të gjetur të mbijetuar, ndërsa familjarët e vajzave të zhdukura mbeten në ankth dhe lutje për ndonjë lajm shprese.

“Ne do të vazhdojmë kërkimin derisa të gjendet edhe personi i fundit i zhdukur,” tha shefi i Emergjencave të Teksasit, Nim Kidd. Por sfidat në terren janë të mëdha, me rrugë të rrënuara dhe ura të shkatërruara në shumë zona përgjatë lumit Guadalupe, transmeton albinfo.ch.